O expresidente do Deportivo Augusto César Lendoiro foi intervido de urxencia este venres pola noite e con resultado satisfactorio dunha afección cardíaca e permanece hospitalizado no Complexo Hospitalario Universitario da Coruña (Chuac).
O exdirigente do conxunto galego, que ten 72 anos, ingresou este xoves no hospital coruñés por unha pneumonía, segundo informaron a Efe fontes próximas á familia.
Inicialmente respondeu ben ao tratamento, pero a súa situación empeorou este venres pola tarde produto dunha afección cardíaca.
Cara ás 22 horas, Lendoiro tivo que ser sometido a unha intervención cirúrxica de urxencia para solucionar a doenza que presentaba nunha válvula do seu corazón.
O resultado da operación, que durou algo menos de tres horas, foi satisfactorio e os médicos son optimistas, aínda que están pendentes da súa evolución, precisaron as mesmas fontes.
Lendoiro, que está na UCI do hospital coruñés, presidiu o Deportivo cinco lustros, entre 1988 e xaneiro de 2014, cando lle sucedeu o actual dirixente do club coruñés, Tino Fernández.
Ás súas ordes, a entidade galega conquistou os seis títulos que locen nas súas vitrinas (unha Liga, dúas Copas do Rei e tres Supercopas de España) e participou cinco tempadas consecutivas na liga de Campións.
