Localizan en Suíza co pai á rapaza de 14 anos que se fugou da casa en Culleredo

Agora investígase se o pai, que está separado da nai, era consciente da viaxe da súa filla

 

A Garda Civil localizou en Suíza a Rocío Juliana N.Z., de 14 anos de idade, que era buscada desde o luns no municipio coruñés de Culleredo. A menor, que se atopa en bo estado, viaxou polos seus propios medios ao país helvético para reunirse co seu pai, segundo informaron a Europa Press fontes da Benemérita. 

A patria potestade da menor tena a nai, que está separada do pai, residente en Suíza. Por iso, as fontes da Garda Civil consultadas sinalaron que estanse a analizar as consecuencias que este episodio pode carrexar para o pai, no caso de que se confirme que cooperou no abandono da menor do seu fogar. 

Respecto diso, estas fontes indicaron que se verificará se o pai era consciente de que a menor estaba a viaxar cara a Suíza e non tentou impedilo nin llo comunicou á nai, responsable da custodia da adolescente. 

No momento en que recibiu a denuncia, a Garda Civil activou todos os protocolos, pero desde o primeiro momento os axentes foron conscientes de que a menor escapara da casa porque se puxo en contacto con familiares e amigos e díxolles que non a buscasen e revelou que se dirixía a atoparse co seu pai.

Nestes momentos analízanse as leis suízas e os tratados internacionais para determinar como proceder para devolver á menor ao seu fogar en Culleredo e que consecuencias legais poderían carrexar ao pai se se demostra que colaborou coa marcha da súa filla.