Feijóo avoga por dialogar co persoal de Xustiza pero ve inasumible a petición sindical

"Se aceptásemos esa solicitud para todo o persoal da Xunta, serían 600 millóns de euros", advirte na sesión de control no Parlamento

Alberto Núñez Feijóo. ELISEO TRIGO (EFE)
photo_camera Alberto Núñez Feijóo. ELISEO TRIGO (EFE)

O presidente da Xunta, Alberto Núñez Feijóo, avogou por continuar coas negociacións cos sindicatos da administración de Xustiza en Galicia, que este mércores inician unha folga indefinida, pero asegurou que o Goberno non pode aceptar as condicións que propoñen. Na sesión de control no Parlamento, admitiu que os traballadores deste sector merecen melloras nas súas condicións laborais, consciente de que durante a crise "todos os empregados públicos botaron unha man enorme para cadrar" as contas públicas, pero non por iso pode dar luz verde a todas as súas reivindicacións. 

"Se aceptásemos esa petición para todo o persoal da Xunta, serían 600 millóns de euros, proponme vostede que incremente o gasto de persoal en 600 millóns de euros?" cuestionoulle ao portavoz de En Marea, Luís Villares, en resposta á súa pregunta ante a que puxo en dúbida se a oposición "quere solucionar o problema da Xustiza ou incendiar o problema".

Así, o xefe do Executivo autonómico censurou que na oposición "están a pedir unha cousa distinta para algúns funcionarios e non lles importan os outros" para os que non piden as mesmas condicións. 

Ademais de sobre Xustiza, os portavoces dos grupos interpelaron ao presidente galego sobre a deterioración nos servizos públicos da comunidade, extremo que Núñez Feijóo rexeitou ao soster que "os servizos públicos están infinitamente mellor xestionados" agora en Galicia que durante o bipartito, e do que o están nos municipios nos que non goberna o PP.

Comentarios