Anxo Quintana admite que entre el e Pérez Touriño "fallou a comunicación"

Anxo Quintana. AEP

"Somos persoas pouco comunicativas e custounos cambiar. Xa llo dixen a el en máis dunha ocasión", declarou o exvicepresidente da Xunta

O exvicepresidente da Xunta Anxo Quintana analizou este mércores a situación do Goberno bipartito de BNG e PSdeG que, entre 2005 e 2009, dirixiu Galicia, e constatou que "fallou a comunicación" entre el e o socialista Emilio Pérez Touriño, quen exerceu de presidente daquel Executivo.

"O que faltou entre Touriño e eu é que os dous somos persoas pouco comunicativas e custounos cambiar. Xa llo dixen a el en máis dunha ocasión, pero creo que non foi o maior problema, porque sempre nos tivemos respecto e non faltou o diálogo", esgrimiu, nunha entrevista coa Radio Galega.

Dito isto, esgrimiu que "o maior problema", baixo o seu punto de vista, é que o PP "era unha máquina política de enorme peso". "Non nos demos conta e pensamos que o adversario estaba vencido antes de que o estivese", reflexionou Quintana, quen, aínda que abandonou o BNG, recoñece que o seu voto "segue sendo nacionalista".

Do mesmo xeito, aínda que ve En Marea como "un proxecto de xente ben intencionada e moi válida", considera que é "pouco útil para Galicia neste momento".