O Banco de Luxemburgo pide ao xuíz que envíe a prisión a Arantxa Sánchez Vicario e o seu marido

A entidade financeira esixe á parella o pago dunha débeda de 7,5 millóns de euros

Santacana y Arantxa Sánchez Vicario. EFE
photo_camera Santacana e Arantxa Sánchez Vicario. EFE

O Banco de Luxemburgo pediu á titular do xulgado de instrución número 4 de Barcelona que ordene o ingreso en prisión de Arantxa Sánchez Vicario e o seu marido, Josep Santacana, aos que esixe o pago dunha débeda de 7,5 millóns de euros. Segundo informaron fontes xudiciais, a acusación exercida pola entidade financeira presenta esta solicitude cando está mediada a instrución da querela que interpuxo contra a parella polos delitos de alzamento de bens e fraude.

O Banco de Luxemburgo reclama a entrada no cárcere da tenista e o seu esposo co argumento de que dispoñen de suficientes fondos para devolver a débeda pendente e que se instalaron no estranxeiro —concretamente Miami— co propósito de evadir a acción da Xustiza. A defensa de Sánchez Vicario dispón agora de varios días para presentar as alegacións que considere oportunas.

A petición do Banco de Luxemburgo, que avanzou o xornal El País, enmárcase na querela que presentou en 2016 contra a parella, despois de tentar sen éxito, desde o ano 2010, cobrar as cantidades con que avalou á tenista para pagar unha multa de 5,2 millóns euros por fraude a Facenda. A Axencia Tributaria percibiu esa cantidade mediante un aval do Banc de Sabadell, que, á súa vez, cobrou mediante un contraaval subscrito co Banco de Luxemburgo.

A tenista, que sempre alegou que o seu patrimonio o manexaba o seu pai, está agora en proceso de separación de Josep Santacana.

Comentarios