O Ministerio de Defensa informou do falecemento do piloto do avión estrelado na mañá deste luns en augas do mar Menor, tras o achado de restos humanos na zona próxima ao accidente.
Segundo informou Defensa nun comunicado, "a falta de confirmación da autoridade forense respecto dos restos aparecidos, todo fai indicar que o piloto faleceu".
TRAXEDIA. O avión C-101 do Exército do Aire realizaba un voo de instrución cando se precipitou ao mar, fronte á localidade da Manga (Murcia) ás 9.38 deste luns.
O piloto, que pertence á Academia Xeral do Aire, era o único tripulante do aparello e logrou exectarse antes do impacto, o que sucedeu por circunstancias que aínda se descoñecen, informaron fontes de Defensa.
Partes do avión estrelado enfronte da praia Galúa chegaron á beira -onde se respiraba un forte cheiro a gasolina-, e ao lugar achegáronse militares da Academia Xeral do Aire (AGA) para supervisar os labores do rescate.
A citada praia foi acordoada e o Concello de Cartaxena ordenou o seu peche ao baño.
Nas tarefas de procura traballaron efectivos da Garda Civil, da Academia Xeral do Aire, da Policía Local, do 112 e de Cruz Vermella.
En Youtube colgouse un vídeo no que pode verse con nitidez como o avión facía un bucle ou looping e entraba na auga, aínda que nesas imaxes non se aprecia se o piloto saíra exectado.