O expresidente de Francia Nicolas Sarkozy será xulgado polo Tribunal Correccional por corrupción e tráfico de influencias no chamado caso das escoitas, informa este xoves o diario Le Monde. Xunto a el, segundo o rotativo, tamén sentarán no banco, tal e como o solicitou a Fiscalía Nacional Financeira o pasado outubro, o seu avogado, Thierry Herzog, e o antigo maxistrado Gilbert Azibert.
A investigación deuse por finalizada en 2016, pero diversos recursos alongaron o proceso, e a decisión dos xuíces de instrución, que pode ser recorrida polos afectados, asinouse este xoves. Os maxistrados picaran o teléfono de Sarkozy ante as sospeitas de que puido recibir financiamento do réxime libio de Muamar El Gadafi (1969-2011) durante a campaña que en 2007 o levou ao Elíseo, algo polo que foi imputado o pasado 21 de marzo.
Nesas escoitas descubriron conversacións entre o expresidente e o seu avogado das que se deducía que trataban de obter, a través do xuíz Azibert, información secreta doutro sumario que investigaba se Liliane Bettencourt, herdeira do imperio cosmético L'Oréal, financiou ilegalmente a súa campaña de 2012.
Algunhas desas conversacións foron publicadas na prensa e deixaban entrever que Sarkozy estaba disposto a axudar ao xuíz a obter un posto en Mónaco a cambio de que influíse na decisión do Tribunal Supremo sobre o caso Bettencourt.
En marzo de 2016, o Tribunal Supremo validou de forma definitiva a case totalidade das escoitas ao expresidente sobre as que se sustenta a súa inculpación, o que deixou aberta a vía para o xuízo anunciado este xoves. Sarkozy ten pendente ademais un xuízo polo presunto financiamento irregular da súa campaña ás presidenciais de 2012.
Trátase do chamado caso Bygmalion, unha suposta trama de falsificación de facturas para ocultar gastos electorais e burlar así os límites legais, coa que, segundo a acusación, gastou polo menos 42,8 millóns de euros fronte aos 22,5 millóns autorizados.
