A localidade lucense de Sarria, en pleno Camiño Francés, prepárase para recibir o vindeiro martes a visita do rei Felipe VI, que se desprazará a Galicia con motivo do Ano Santo para mostrar o seu apoio á difusión da ruta xacobea.
O delegado do Goberno en Galicia, José Miñones, confirmou que este venres se celebrará unha reunión para planificar e desenvolver o dispositivo de seguridade que se activará con motivo desta visita.
Polo momento non transcenderon os actos que o Rei protagonizará en Sarria, aínda que si se deu aviso ás autoridades municipais e axentes das forzas de seguridade de que está previsto que o martes 26 de abril estea en Sarria para apoiar a difusión do Camiño de Santiago na recta final deste ano Santo bianual.
O monarca será recibido no cuartel da Garda Civil da vila, tal e como confirmou o Concello nas súas redes sociais. O xefe do Estado coñecerá de primeira man estas instalacións e "o seu importante labor na protección e seguridade do Camiño de Santiago", indicou o Concello.
Así mesmo, está previsto que estea acompañado en Galicia doutras autoridades a nivel estatal, como o ministro do Interior, Fernando Grande-Marlaska.
Sarria é un dos puntos máis importantes do Camiño de Santiago francés, o que percorre un maior número de peregrinos e o que conta cunha maior tradición histórica. De feito, esta localidade lucense é da que parten a maior parte dos camiñantes, xa que marca o límite dos 100 quilómetros esixidos para obter a compostela.
A preguntas dos medios, o delegado do Goberno recordou que a Casa Real está "moi activa e presente en Galicia", con creo "que recordar, 11 visitas" desde que el asumiu o cargo. Neste sentido, destacou que a da próxima semana "non será a última", xa que está previsto que o Rei volva a Galicia a finais do mes de maio para un acto na cidade de Vigo, no que inaugurará a Cidade Xustiza.
