O calendario da campaña da renda 2017 activouse este xoves co lanzamento da nova aplicación que permitirá presentar a declaración a través do móbil e a posta a disposición dos contribuíntes dos datos fiscais, vinte días antes de que arrinque o 4 de abril o prazo de presentación por vía telemática.
Ao mediodía, miles de persoas xa se descargaron nos seus teléfonos móbiles a app, dispoñible para usuarios de Apple e Android. Para obtela, basta con buscar Axencia Tributaria (Aeat) na tenda de aplicacións e xa aparece. Esta ferramenta fai posible presentar a declaración do IRPF cun só clic naqueles casos en que unicamente hai que confirmar o borrador porque Facenda xa dispón de toda a información de forma correcta.
Se hai que facer cambios ou incorporar novos datos, o proceso xa non é tan inmediato. A app remite ao sistema Renda Web, ao que se accede desde o servidor da Aeat. No caso de que o usuario faga as modificacións ou incorporacións pertinentes a través do smartphone, a aplicación mantense mentres nun segundo plano para volver despois a ela e poder presentar a declaración. O contribuínte tamén pode realizar as modificacións no computador se lle resulta máis cómodo e volver despois á app.
DATOS FISCAIS. En todo caso, a rendición de contas ante o fisco aínda non pode executarse. De feito, a principal función que ten por agora a nova ferramenta é a de permitir o acceso aos datos fiscais, para comprobar que información clave para a declaración manexa Facenda e ver se é a correcta. Trátase, por exemplo, do domicilio fiscal, os rendementos do traballo, contas bancarias ou a información catastral dos inmobles en propiedade ou os rendementos do capital. Estes datos tamén están dispoñibles xa a través da páxina web da Axencia Tributaria. E é que Facenda decidiu adiantar este ano a posta en marcha deste servizo co obxectivo de axilizar a presentación das declaracións, posible a partir do 4 de abril por medios electrónicos. Quen opten pola vía máis tradicional de acudir ás oficinas da Aeat terán que esperar ao 10 de maio.
O que pretende o fisco é rebaixar a presentación física e espera que a aplicación móbil axude. E como funciona? Unha vez descargada, o usuario ten que identificarse. O xeito máis fácil é mediante o número de referencia
—que xa se pode solicitar tamén para acceder a Renda Web—, que se pode obter introducindo a casa 450 da declaración de 2016, o DNI e a súa data de caducidade. Tamén co sistema CL@VEPIN ou certificado electrónico. Ese número quedará almacenado para usos posteriores.
FUNCIONALIDADES. Unha vez dentro, o contribuínte debe pulsar o botón Renda 2017 e xa estará na zona de tramitación. Se os datos fiscais que ten Facenda son correctos e non hai que introducir nada novo, entón pódese confirmar o borrador sen máis. O que non permite é facer modificacións, posibles só a través do programa que desde o ano pasado substitúe ao Padre. Finalizado o proceso, a app confirmará que a declaración se presentou de forma correcta e proporcionará un código que certifica a validez do procedemento e permite acceder a elas na web da Axencia Tributaria.
Para as declaracións conxuntas será necesario identificar tamén ao cónxuxe. A aplicación mostrará se esa opción é mellor que a individual ou non. En todos os casos, permitirá acceder á vista previa da declaración en PDF e gardar a presentada nese mesmo formato, para ter unha copia no dispositivo.
Ademais, ofrecerá a posibilidade de consultar o estado de tramitación da declaración e, se sae a devolver, o contribuínte pode recibir unha mensaxe cando Facenda ordene o desembolso. E é que a app dá a opción ao contribuínte de aceptar a recepción de avisos personalizados como estes.
Este novo sistema permitirá xestionar a declaración non só do dono do móbil, senón tamén de familiares e achegados. Aceptará ata 20 usuarios para o mesmo terminal, cada un co seu número de referencia. O obxectivo é achegar esta vía aos contribuíntes menos familiarizados coas novas tecnoloxías.
MÁIS SERVIZOS. Outra novidade nesta campaña será a plena implantación do plan de asistencia Le llamamos, que foi obxecto dunha proba piloto o ano pasado. En que consiste? Desde o 4 de abril poderase solicitar unha cita previa por internet ou teléfono e posteriormente un empregado da Axencia Tributaria chamará ao cidadán para axudarlle a preparar e presentar a declaración. O fin é reducir o número de persoas que acoden ás oficinas para recibir atención presencial, 3,2 millóns o ano pasado.
Este servizo poderano utilizar os contribuíntes con rendas do traballo inferiores a 65.000 euros, con rendementos de capital que non superen os 15.000 euros ou con rendementos do capital inmobiliario que proveñan como máximo dun só inmoble.
Facenda tamén iniciou este xovesos envíos postais cos datos fiscais, o número de referencia e a información dos servizos de asistencia a disposición dos contribuíntes. Aqueles que o ano pasado confirmaron sen cambios a súa renda nunha oficina da Aeat —uns 860.000— serán os primeiros aos que se remitirá esa información. Unha novidade este ano é que non se enviarán borradores por correo ordinario.
