O Cantabria inicia dous meses de misións para a Otan

O Buque de Aprovisionamento de Combate (BAC) Cantabria partiu este luns de Ferrol para incorporarse, durante dous meses, á Agrupación Naval Permanente número 1 (SNMG-1) da Otan, na que acompañará, entre outras, á fragata Álvaro de Bazán.

Durante o seu despregamento, que se realizará maioritariamente en augas do Mar do Norte, o Cantabria proporcionará apoio loxístico operativo a todas as unidades navais aliadas da SNMG-1 e participará en exercicios multinacionais avanzados, tras realizar durante as últimas catro semanas un intenso alistamento no Arsenal de Ferrol.

O buque permanecerá integrado na agrupación ata o próximo 22 de marzo, data na que iniciará tránsito de regreso a Ferrol, despois de recalar en portos como os de Londres, Amsterdam, Bergen e Trondheim, estes dous últimos de Noruega.

O capitán de fragata Santiago de Colsa Trueba, que estará ao mando do Cantabria, explicou que o buque encargarase especificamente de proporcionar "combustible, víveres e calquera outro pertrecho que poida necesitar a agrupación", ademais de ofrecer a súa "alta capacidade sanitaria" para calquera situación.

Antes de integrarse na agrupación da Otan, o buque fará unha breve escala na base naval de Rota (Cádiz) para incorporar a Unidade Aérea Embarcada e un Equipo Operativo de Seguridade de Infantería de Mariña.