Os supostos negocios lícitos que pretendeu pór sobre a mesa a narcoletrada máis famosa de España non convenceron á Audiencia. A Sección Segunda, a mesma que condenou, entre outros, a Rafael Bugallo, O Mulo, e a José Ramón Prado Bugallo, Sito Miñanco, entendeu acreditado que Tania Varela Otero non só se dedicou ao narcotráfico antes da súa mediática fuxida da Xustiza, senón tamén a lavar os beneficios obtidos a través do mesmo. O presidente do tribunal, José Juan Barreiro, impúxolle unha pena dun ano e oito meses de cárcere, ademais do pago dunha multa de 56.000 euros, ao entender como atenuante moi cualificada as dilacións indebidas, dado que se trata dun proceso cuxa instrución se demorou máis da conta por causas alleas aos investigados.
O xuíz entende probado que "como consecuencia da actividade de narcotráfico á que Tania Varela viña dedicándose (...) e pola que foi condenada a sete anos de prisión (...) enriqueceuse co produto da venda de sustancias estupefacientes, e levou a cabo durante os anos 2005 e 2006 operacións coa finalidade de dar entrada no tráfico mercantil lícito ao diñeiro ilícito procedente do narcotráfico".
A Audiencia destaca a creación de Promocións Rialto e a "achega de 45.000 euros para a adquisición duns terreos en Porto Meloxo (O Grove), ocultando a titularidade real dos mesmos", entre outros movementos ilícitos.
Sobre os ingresos que a narcoletrada dixo ter naquel momento, a sentenza explica que "nada diso quedou acreditado", e engade que "as cantidades que inviste na adquisición do vehículo (un Audi A3) e que achega á sociedade para a compra do terreo non teñen reflexo nos movementos de contas realizados nese período, como se desprende do estudo das contas bancarias das que é titular a acusada".
Tania Varela, que foi condenada xunto á que era a súa parella, David Pérez Lago (fillastro de Oubiña e presunto socio de Sito Miñanco), saltou á fama despois de fuxir da Xustiza cando soubo que debía pasar sete anos entre reixas. A narcoletrada foi capturada nunha operación liderada polos Mossos d'Esquadra coa participación da Brigada Central de Estupefacientes, tras o que ingresou en prisión para cumprir a pena que tiña pendente. Agora acumula unha máis.
