Beiras defende as Mareas como "osíxeno" necesario para sanear os concellos

O portavoz nacional de Anova e de AGE no Parlamento galego, Xosé Manuel Beiras, reivindicou hoxe o papel das candidaturas de unidade popular e as mareas, como a de Compostela Aberta que encabeza Martiño Noriega, nas eleccións municipais do domingo 24, xa que son o "osíxeno" necesario para "sanear" as institucións.

Beiras, que apenas participará na campaña por decisión propia de acordo con Anova, apoiou a Martiño Noriega, coportavoz nacional nesta formación, porque Compostela é a súa cidade e porque pode ser o inicio dunha "bóla de neve" que chegue a todo o país.

Para o veterano dirixente, estas opcións políticas que se foron configurando por todo o país son as únicas que poden intentar sanear, se se pode, as institucións, xa que están conformadas coa enerxía da xente que dixo basta, que se fartou, e que pretende volver gobernarse a si mesma a favor da maioría social, sobre todo, das clases populares.

"Gobernar hoxe sen estar conectado cos cidadáns é imposible porque ou te sometes á plutocracia ou te descabezan; polo tanto, a forza está na xente", sinalou.

O acto, celebrado a modo de conversación entre Martiño Noriega e Xosé Manuel Beiras con temas introducidos por unha moderadora, Marta Lois, comezou cun minuto de silencio como denuncia e condena do asasinato onte en Ourense dunha muller a mans, presuntamente, do seu marido.

Beiras fixo un repaso por toda a súa etapa en Compostela, unha cidade que é un tesouro e que foi convertida en "momia, nun cascarón baleiro" polas políticas do PP, sinalou.

Na súa intervención reivindicou a enerxía que se percibe nas candidaturas de unidade popular que "non se resignan a perder a súa condición como tal e a ser súbditos".

"Esa enerxía está aí, máis na situación de transición e en crise da política, das institucións, nas que a corrupción converteuse nun sistema de poder, polo que é necesario que dos cidadáns aflore a auto defensa e ser protagonistas da política; este é ou sentido das Mareas e de Compostela Aberta", incidiu Beiras.

Alertou de que a política está chea de "compromisos podres" polo que o primeiro que fai falta é "unha política de saneamento e poñer fin á segunda restauración borbónica".

Segundo Beiras, a "traxedia" de Galicia é que é un país "acéfalo, descapitado" de grupos dirixentes na sociedade, de lingua, de cultura polos gobernos de "nazinecios" que se dedican a promover campañas de "analfabetización" da lingua propia.

Censurou que o PP actúe de feito como un "partido único" porque non acepta nada no Parlamento e sentenciou que en Galicia "non hai Goberno senón unha panda de delincuentes, porque os crimes o son aínda que os tribunais non os condenen".

"Unha cousa é crime e outra un delito. Se un delito queda impune non deixa de ser delito nin un delincuente quen o fixo, pero buscan a impunidade como poden", sinalou.

Así, "mentres un rapaz calqueira pásase da raia un pouco en reivindicar este país e ao mellor cae en certas dinámicas de dicir, pois agora voulle meter unha bomba, unha tarteira, non o chega a facer e está condenado a sete anos, despois de que o rebaixaran de 18".

E doutra banda están os "delincuentes, que atentan contra os dereitos constitucionais e humanos" e que "causan mortes de vellos e mulleres, que haxa persoas sen máis ingresos que 300 euros ao mes, que os botan de casa para que os bancos as revendan e ademáis o fagan a prezos extraordinarios, que causan suicidios, mortes... os que no Parlamento votan en contra de que os enfermos de hepatite C non teñan que pasar pola comisión da estafadora conselleira de Sanidade".

Martiño Noriega pediu que non se esqueza o sucedido na lexislatura que termina en Compostela, con ata tres alcaldes por problemas xudiciais do PP.

Mostrouse convencido de que a candidatura cidadá que encabeza será a lista maioritaria tras as votacións do 24-M e explicou que pretende "abrir as fiestras" e pór os municipios a disposición dos dos cidadáns, facelos corresponsables da gobernanza e do ben común.

"Imos ser capaces, temos unha candidatura moi consistente e moi preparada. Compostela Aberta non ten comparación no proxecto para cambiar a cidade e é un proceso absolutamente imparable", defendeu.