Un total de 943 persoas optarán ás 31 prazas de persoal de alta cualificación, en escalas de enxeñeiros, enxeñeiros técnicos e subinspección urbanística, convocadas en cinco oposicións da Xunta de Galicia. As listas de admitidos e excluídos foron publicadas no Diario Oficial de Galicia (DOG), que recolle as resolucións da Dirección Xeral da Función Pública.
Trátase de oposicións para o ingreso no subgrupo A1 —enxeñeiros en especialidade de enxeñería agrónoma e de Camiños—, no A2 —enxeñeiros técnicos en especialidades agrícola e de obras públicas— e na escala de subinspección urbanística. Convocáronse 6 prazas para enxeñería agrónoma, con 143 aspirantes e 9 para a de camiños, con 204 persoas admitidas.
Para a escala de enxeñeiros técnicos agrícolas convocáronse 8 prazas, ás que optan 354 persoas, mentres que para obras públicas hai 5 prazas dispoñibles para 126 aspirantes. Finalmente, para subinspección urbanística convocáronse 3 prazas ás que optarán 116 persoas.
Con estas oposicións, a Xunta persegue reforzar ámbitos relacionados coas obras públicas ou de control de urbanismo e chan, como a inspección e vixilancia das edificacións, do uso do chan ou de infraccións urbanísticas.
