Dúas persoas resultaron feridas na tarde deste luns en Nigrán, nunha colisión na que se viron implicados catro vehículos.
Segundo informou o 112, o accidente tivo lugar na PO-552, en concreto no punto quilométrico 11, ao fío das 15.55 horas.
Foi entón cando os axentes da Policía Local de Nigrán alertaron do ocorrido ao 112, cuxo persoal trasladou o aviso ao 061, ao GES do Val Miñor e á Garda Civil de Tráfico.
SAÍDA DE VÍA EN TUI. Tamén este luns, en Tui, unha persoa tivo que ser excarcerada polos bombeiros do Porriño tras saírse da vía o turismo no que viaxaba.
Ademais, debido ao accidente, víronse afectados un poste da iluminación pública e outro da liña telefónica. Sucedeu na A-55, na saída Tui Norte, en sentido Portugal.
O 112 tivo constancia do sinistro uns minutos logo das 16.15 horas, a través da alerta dun particular. Alertou á Garda Civil de Tráfico, aos bombeiros do Porriño, á Policía Local e ás empresas subministradoras de electricidade e conexión telefónica.
DOUS FERIDOS NA RÚA. Ademais, nesta xornada, dúas persoas foron trasladadas a un centro hospitalario tras sufrir unha saída de vía no termo municipal da Rúa. Ocorreu no punto quilométrico 468 da N-120, ao fío das 16.50 horas.
Segundo indicóuselle ao 112 Galicia, tamén no mesmo punto tivo lugar unha colisión por alcance entre dous vehículos, cuxos ocupantes detiveran a marcha para socorrer ás persoas feridas na saída de vía. Neste caso, non houbo que lamentar danos persoais.
Varios particulares contactaron co 112 Galicia para alertar do sinistro e indicaron no seu relato que un dos feridos estaba atrapado. Así, ata o lugar do sinistro acudiron, tras recibir o aviso, efectivos sanitarios do 061, os bombeiros e o GES de Valdeorras, a Policía Local e a Garda Civil de Tráfico.
Unha vez no lugar dos feitos, os membros do Servizo de Prevención, Extinción de Incendios e Salvamento de Valdeorras descartaron empregar o material de excarceración. Iso si, axudaron ás persoas a saír do coche, que acabou nunha posición que impedía aos seus ocupantes saír polo seu propio pé.
