A Policía Nacional detivo en Madrid un axente do Servizo de Vixilancia Aduaneira destinado en Vilagarcía acusado de filtrar información a distintas bandas de narcotraficantes galegos. A investigación, que levaba tempo fraguándose, selouse do peor modo posible para o investigado: foi cazado in fraganti mentres recibía preto de 400.000 euros de mans dun narco colombiano.
Os investigadores sospeitan que traballaba para a flor e nata do narco das Rías Baixas. Non en balde, estudan a súa posible vinculación coas filtracións ocorridas en asuntos recentes, como a fuga de Juan Carlos Santórum tras a caída do Karar ou a non recepción da cocaína do semisomerxible de Aldán.
O detido permanece na sede policial de Canillas (Madrid) á espera de comparecer ante o xuíz de Vigo que instrúe a causa contra el.