A Garda Civil investiga por un delito de malos tratos animais a tres pontevedreses acusados de golpear con estacas a catro cabalos -un dos cales morreu- nas inmediacións dun colexio do municipio ourensán de Avión.
Segundo informou o instituto armado, os axentes do Seprona tiveron coñecemento dos feitos, ocorridos en decembro de 2018, tras o testemuño de varios veciños.
Logo de iniciar unha investigación, o Seprona constatou que un grupo de persoas -residentes en distintos puntos da provincia de Pontevedra- desprazáronse en dous vehículos e un remolque ata Avión, onde presuntamente golpearon brutalmente aos cabalos.
Os équidos estaban dentro do recinto do colexio público e un deles morreu por mor das lesións sufridas.
Tras tomar declaración en calidade de investigados a tres integrantes do grupo por un delito de malos tratos animais, a Garda Civil remitiu as dilixencias ao Xulgado de Primeira Instancia e Instrución de Ribadavia.
