O axente encargado da reconstrución dos feitos no coñecido como crime da 'Esmorga' declarou este luns en Ourense que "en ningún momento se tivo a impresión de que a vítima se caese rodando por baixo da varanda", tal e como sostén a versión dun dos acusados. A non coincidencia das declaracións dos procesados cos datos e vestixios recollidos na zona puxo, novamente, de manifesto as contradicións nas versións de Eduardo L.F. e Óscar E.L., xulgados por asasinato na segunda semana da vista oral na Audiencia Provincial de Ourense.
O encargado da reconstrución das circunstancias nas que faleceu o mozo romanés Alexandru W.B. en decembro de 2014 reiterou, como xa fixeron outros axentes chamados a testificar a pasada semana, "a existencia dunha mancha de sangue da vítima na parte superior da varanda", que indica que "o corpo tería que estar a unha determinada altura", en lugar de ser "arrastrado polo chan".
Por outra banda, "é moi difícil caer por ese oco; se unha persoa rodando levanta unha soa man xa é capaz de alcanzar o primeiro eixo horizontal do valo e tamén podería parar a súa caída cos pés dada a disposición dos eixos verticais", engadiu.
Polas características da mostra biolóxica de sangue na varanda, o axente apuntou a que "alí houbo algún tipo de resistencia por parte de Alexandru". Así mesmo, confirmou a existencia de restos biolóxicos da vítima "a uns 10 metros do lugar onde os acusados estacionaron o vehículo", algo que os levou a pensar que a vítima podería intentar escapar da zona.
"Alí houbo algún tipo de resistencia por parte de Alexandru", subliñou un axente
VIVENDA E COCHE, LIMPADOS. Tamén foi chamada a comparecer este luns a axente do Laboratorio de Criminalística que participou na inspección ocular da vivenda de Eduardo L.F. e que manifestou que "o patio fora regado e limpado" pero, a pesar diso, atoparon "pingas de sangue por salpicadura e proxección" na porta de entrada á cociña.
Pola súa banda, no caso da inspección do vehículo que estivo custodiado por axentes da Garda Civil, sinalou que "parecía que o vehículo fora limpado". Mediante o emprego de luces forenses atoparon dúas manchas de sangue no interior do vehículo. A primeira delas pertencía a Alexandru, no centro do respaldo do copiloto, mentres que a atopada no apoiabrazos do copiloto deu positivo con Óscar E.L..
Á súa vez, a axente apuntou que lle chamou a atención" que no interior do vehículo había gran cantidade de mudas de roupa", entre a que se atopaban "ao redor de nove camisetas, 11 calzóns, cinco pares de calcetíns, dous sudaderas". Iso pode soster, novamente, a hipótese de Óscar E.L. pensase darse á fuga, unha posibilidade á que tamén se aludiu a pasada semana durante o xuízo.
LESIÓNS DO CORPO. A mesma axente, responsable da elaboración da reportaxe fotográfica da autopsia, en relación ás principais lesións observadas no corpo da vítima, describiu "sinais de agarre nas mans e a clavícula". Tamén se referiu a que "tiña a orella dereita arrancada, os ósos do cranio rotos, os beizos inchados e faltábanlle pezas dentais".