Os datos epidemiolóxicos seguen constatando o descenso da sexta onda da pandemia en Galicia, que ten 26 hospitalizados menos por esta enfermidade, coa cifra de contaxios situada por baixo dos 2.500 diarios, mentres continúa a redución de casos activos aínda que a un ritmo máis moderado na última xornada.
Segundo os datos do Servizo Galego de Saúde (Sergas) das 18 horas do mércores 15 de febreiro, hai 598 persoas con covid-19 ingresadas nos hospitais galegos, das que 562 están en planta, 25 menos, e 36 en Uci, unha menos.
O número de persoas con infección activa é de 33.355, o que supón 784 menos que o día anterior, e os contaxios foron 2.455 nunha xornada, unha vintena máis que o martes. Ademais, o Sergas comunicou cinco mortes correspondentes a este mércores, co que a cifra de falecementos elévase a 3.061.
Os falecidos, catro homes e unha muller, tiñan entre 81 e 92 anos. Todos eles contaban con patoloxías previas e corresponden ás áreas sanitarias da Coruña (3), a de Ourense (1), e a de Pontevedra (2).
A incidencia acumulada continúa á baixa na comunidade, con 1.682 casos por cada cen mil habitantes a catorce días, 108 menos que o mércores. A sete días, este índice sitúase en 633, uns 36 puntos menos, aínda que segue por encima da media nacional e é a máis alta de España, debido tamén á contabilización dos autotest positivos.
Desde o inicio da pandemia en Galicia contaxiáronse 480.598 persoas e curáronse 444.235, das que 3.234 foron na última xornada.
Por áreas sanitarias, só na de Lugo, con 3.611 (+10), e Ourense, con 3.707 (+59), soben os casos activos. Aínda que seguen sendo as da Coruña, con 7.284 (-273) e Vigo, con 7.025 (-311) as que presentan cifras máis elevadas.
