O Concello de Vigo iniciou este mércores a montaxe da gran nora do Nadal que se instalará na rúa Concepción Arenal, á beira da Praza de Compostela, que terá 62 metros de altura e desde a que, segundo o alcalde, Abel Caballero, "verase Nova York".
O rexedor da capital olívica supervisou o inicio da montaxe da atracción, que obriga a restrinxir o tráfico nun tramo de Areal para facilitar a colocación das grandes pezas desta nora, na que poderán viaxar ata 192 persoas á vez. Desde o alto da nora, chanceou o alcalde, poderá verse, por unha banda as rías de Vigo, Pontevedra e Arousa; por outro, a ponte de Rande e Redondela, e "cara ao oeste, verase Nova York".
Abel Caballero destacou que a instalación contará con case 200.000 luces led e unha gran pantalla no seu centro onde se poderán ler mensaxes "como, por exemplo, dicirlle ao alcalde de Madrid que lles gañamos coas luces" ou que "Vigo é a cidade máis bonita do mundo".
A nora comezará a funcionar o 24 de novembro, ao día seguinte do grande acendido da iluminación do Nadal, e estará operativa durante toda a campaña de Nadal, de 11 a 23 horas. O único que o rexedor non quixo desvelar é o prezo que haberá que pagar para subirse nela: "Iso é cousa do que a fai".
O alcalde recordou que esta nora, xunto co resto de atraccións do Nadal (iluminación, poboado de Nadal, mercadillo, etc.), atraerá moitos máis visitantes que o ano pasado, cando —dixo dous millóns de persoas pasearon polo centro de Vigo nesas datas.
