No marco da Semana Verde de Galicia, en Silleda, presentouse a nova marca de calidade para a carne galega, ''VAC.1''. Trátase dun distintivo promovido pola Consellería do Medio Rural da Xunta e consensuado cos axentes do sector na Mesa da Carne.
A posta de longo desta marca culmina un proceso iniciado hai máis de un ano, liderado polo Centro Tecnolóxico da Carne e da Calidade Alimentaria (CTC), que posúe e xestiona a nova marca, detentando o órgano de control e a custodia dos diferentes rexistros aos que terán que adscribirse as explotacións gandeiras, os matadoiros e as plantas de procesado que desexen traballar con VAC.1 e cumpran as condicións precisas.
Segundo explicaron os responsables desta iniciativa no acto de presentación, que estivo presidido polo titular de Medio Rural, Alfredo Suárez Canal, existen en Galicia máis de 335.600 vacas dedicadas á produción de leite e preto doutras 350.000 de aptitude cárnica. As primeiras, na súa maior parte, pertencen á raza Holstein-Frisian –as comunmente coñecidas como vacas frisonas–, das que os gandeiros aproveitan o leite.
No caso das crías nais, cando deixan de ser produtivas e son enviadas ao matadoiro, a realidade é que a súa carne, que ten unha calidade excepcional, é pouco valorada no mercado. A nova marca xorde da necesidade de revalorizar a carne destas vacas, aumentando a súa calidade e a súa produción a partir dunha etapa de cebo previa ao sacrificio e baseada nunha alimentación con elevado contido enerxético.
Na presentación desta nova marca de calidade oficiaron como mestres de cerimonias os cociñeiros Martín Berasategui e Flavio Morganti (italo-galego, chef do restaurante ''Galileo'' de Pereiro de Aguiar, Ourense). Ambos prepararon cara ao público pratos a base de carne de VAC.1, en concreto un carpaccio con crema de pementos e un tartar clásico.
Mentres traballaban, explicaron varios consellos de gran utilidade sobre a cociña das carnes. Así, por exemplo, fixeron fincapé na necesidade de sacar do frigorífico as pezas unhas horas antes de botalas ao lume, especialmente cando se trata de usar a grella.
Tamén avogaron por utilizar tixolas de certo grosor, que manteñan ben a calor e, por suposto, engadir o sal ao remate da preparación, e non antes de selar a peza.
Na súa intervención, o prestixioso chef vasco Martín Berasategui non se cansou de loubar a calidade da carne galega, ata o punto de definila como ''unha das claves fundamentais do noso éxito na cociña'', e anunciou que está a experimentar no seu banco de probas con partes consideradas ''menos nobles'' dos animais, caso das patas, as orellas, o morro ou o rabo, acadando uns resultados ''excepcionais''.
Despois da breve pero interesante demostración, os asistentes poideron gozar dun menú deseñado para a ocasión por estes dous cociñeiros, a base de carrileira estufada ao mencía; solombo con pementa verde; mini hamburguesa ''MacVAC.1'', albóndegas con infusión de tomate e ourego e guisiño de faldra con cogomelos, entre outras preparacións.
Leite de antes
Tamén no contexto da pasada edición da Semana Verde de Galicia tiveron especial protagonismo os produtos ecolóxicos. Desta oferta, que está a proliferar por todo o país, salientamos unha recente incorporación: o leite cru da empresa ''O Alle'', situada en Lalín (Pontevedra).
Tratase dunha explotación de carácter familiar, pioneira en agricultura e gandeira ecolóxica e sustentable. Ademáis é a primeira e única produtora de leite cru en Galicia.
Leite O Alle aposta por unha actividade gandeira ecolóxica e sostible, ligada estreitamente á agricultura, aproveitando todos os recursos propios da explotación ao máximo para tamén diminuir, na medida do posible, os gastos, contribuindo no mantemento e mellora da fertilidade dos solos.
A filosofía desta empresa susténtase na calidade de tres piares básicos: as praderías, as vacas e o propio leite.
Canto ás praderías, segundo explican desde a empresa, están totalmente libres de abonos químicos, herbicidas, insecticidas ou calquera outro produto de síntese. Son praderías de longa duración, coidadas e conservadas con prácticas tradicionais.
As vacas das explotacións son seres vivos dos que se fai un manexo respectuoso e sen forzar a produción. Por iso non se usa ningún tipo de hormonas, antibióticos nin finalizadores. A súa alimentación basease fundamentalmente en pasto, xa que están nos prados a maior parte do tempo. Como consecuencia dos dous apartados anteriores, desde ''O Alle'' aseguran que o leite que producen estas vacas recupera os sabores auténticos e tradicionais.
Este ''leite de antes'' comercialízase polo de agora a pequena escala, sendo posible tamén realizar pedidos por medio de internet.
Nace VAC.1
