Arrestados por roubo en Santiago dous homes que acumulan 50 detencións

Dous homes, que en común acumulan medio centenar de detencións, foron arrestados en Compostela por unha subtracción, informaron fontes policiais. O pasado 26 de febreiro, os axentes detiveron a un deles por roubo con forza e este mércores a outro acusado de dous roubos con forza. Segundo informa a policía nun comunicado, os feitos remóntanse ao pasado febreiro cando ambos entraron a roubar nunha empresa no Polígono do Tambre (Santiago).

Nun intervalo de dous días entraron en dúas ocasións, e o responsable do negocio o primeiro día botou en falta uns 80 euros e o segundo unha impresora e un tóner. Ao pouco tempo de denunciar os feitos, a policía detivo a un dos autores, de 36 anos e con máis de 30 detencións por roubos.

Tras ser ouvido en declaración polos axentes, foi posto en liberdade tendo que comparecer ante o xuíz cando sexa requirido. O pasado 2 de marzo produciuse un roubo con forza nun bar da zona vella desta cidade. Tras investigacións levadas a cabo polos axentes que levan o caso, púidose identificar o autor dos feitos que subtraeu unha cantidade próxima aos 300 euros.

A este individuo tamén se lle imputa o roubo con forza no almacén do polígono do Tambre, polo que terá que responder ante a xustiza polos dous feitos. Este detido ten 43 anos e 18 detencións ás súas costas por feitos similares.