Con máis de 35.000 artigos en cinco anos de vida, a Galipedia, versión galega da Wikipedia, é a meirande enciclopedia en galego libre e gratuíta. Este é un retrato dela visto por algúns dos seus administradores*
P: Como definiriades o estado de saúde actual da Galipedia?
R: A saúde da Galipedia é boa. Superou a fase de adolescencia. Vai medrando paseniñamente en artigos pero sobre todo está centrada en mellorar a súa calidade. Todos os días se rexistran novos colaboradores.
Ademais, e en comparación con outras wikipedias, ten un número de edicións moi alto en proporción aos falantes en relación a outras wikipedias. E aínda queda moito por facer e mellorar, é a meirande enciclopedia en galego libre e gratuíta.
P: ¿Que diferencia a Galipedia doutros proxectos semellantes?
R: Pois que é en galego, esa é a diferencia máis notable. Somos unha wikipedia mediana, polo que o contacto directo entre todos os usuarios é máis intenso, pero non temos especiais diferencias con outras wikipedias do mesmo tamaño, de feito son máis as cousas que nos unen a todas: o bo que ten a wiki universal teno a galega.
Realidade galega
P: ¿Cal é a importancia do galego na Galipedia, como proxecto? É dicir, máis alá de que os contidos da Galipedia estean en galego, ¿hai unha vontade de crear e adaptar ós contidos á realidade galega (especialmente a través da lingua)?
R: No propio nome da enciclopedia aprézase esa vontade: Galipedia. O engado do prefixo amosa a preocupación coa proxección da cultura galega. A lingua é, por suposto, un aspecto importante e fai especial todo o que escribamos nela.
Hai bastantes artigos traducidos doutras wikis, pero ademais existe a vontade de adaptar eses contidos á nosa realidade e hai xa moitos artigos xerais que teñen un apartado sobre a incidencia en Galiza. Ademais, a garantía de calidade do proxecto é que moitos dos contidos de tema galego da Galipedia son os que se traducen ás wikipedias doutras linguas.
Variedades
P: ¿Como se enfocan as particularidades do galego (variedades lingüísticas, normativas...) dende a Galipedia?
R: Dende a súa creación emprégase a variedade estándar, fixada pola Real Academia Galega. Porén nalgún aspectos temos problemas en canto á terminoloxía. Nestes casos adóitanse empregar manuais técnicos que afortunadamente son cada vez máis numerosos e van solucionando os problemiñas que aparecen.
P: Máis alá da súa función enciclopédica, ¿como valorades a importancia cultural da Galipedia? ¿Credes que actúa de 'catalizador' para a rede galega e en galego?
R: Ó principio quizabes o obxectivo era ir incorporando material, mais ós poucos o horizonte ampliouse e observouse a posibilidade de que a Galipedia puidera ser un medio para que a nosa lingua e cultura estivera presente no mundo dixital, até constituír unha ponte entre o saber inmaterial e o mundo tecnolóxico.
Tamén moitos usuarios fan un labor extraordinario de fotografar cada recuncho do país, cada monumento, cada paisaxe. En calquera caso, escóitanse máis críticas positivas que negativas.
P: ¿Cales son os problemas máis importantes cos que vos atopades os administradores da Galipedia no día a día?
R: A carga de imaxes sen licenza, a copia de material con copyright, a creación de artigos moi curtos e e tamén o de facer de xuíz nalgunhas ocasións. O máis molesto de todos é o vandalismo.
O problema do vandalismo
P: ¿Tedes que lidar con moitos problemas deste tipo?
R: Si. Hai algunha xente con tempo libre que perde o tempo en arramplar co traballo dos demais: elimina información, mete insultos ou traduce contidos a español ou a portugués, entre outras accións. Moitos usuarios gastan o tempo que podían empregar en mellorar outros artigos ou crear novos en desfacer vandalismos.
P: ¿Que tal funciona a democracia interna?
R: Democracia interna é un concepto incorrecto, xa que un dos principios da Wikipedia é que é unha enciclopedia, e non un sistema político. As postas en común sobre opinións sucédense constantemente, tanto nos artigos, como no sistema de categorización, como en normas internas e sobre diversas cousas.
Porén, hai pouca xente que participa nestes debates e bótase en menos unha maior implicación; se hai pouca xente que debata, tamén é máis fácil que se produzan conflitos.
P: Proxectos como Chuza!, parecen demostrar que a 'masa crítica' da rede galego é inferior a doutros contextos lingüísticos e culturais, pero que tamén existe unha maior cohesión. ¿Como afecta isto á Galipedia?
R: Creo que pode ser certo o da maior cohesión, mais tamén, se xorden problemas, estes percíbense como máis complexos e difíciles de resolver. Tamén significa unha maior carga de traballo.
__________
* Respostas de Adrián Estévez e Alberte Álvarez, consensuadas por Xabier Cid, todos eles administradores da Galipedia.
Actualidad