Federico Jiménez Losantos foi condenado por inxurias graves a Alberto Ruiz Gallardón. O tribunal imponlle unha multa de 100 euros ao día durante 12 meses. En total, terá que indemnizar unha multa de 36.000 euros, a metade do que solicitara a Fiscalía.

O xornalista defendeuse no xuízo xustificando que se chamou "traidor, sinistro, bandido, lacayo do Goberno, caradura e fillo de Satanás" ao alcalde de Madrid foi porque o rexedor "non quería que se investigase a fondo o 11-M".

Os informativos da COPE difundiron a noticia cunha valoración do locutor sobre a sentenza: "É ridícula desde o punto de vista económico porque o honor do alcalde só vale seis millóns de pesetas". Tamén manifesta que "por ese prezo" seguirá criticando a Gallardón.

Na edición deste luns de 'La Mañana', Losantos afirma que esta sentenza "supón unha espada de Damocles sobre a liberdade de crítica ao poder político".

Gallardón: ''o máis ofensivo que dixeron sobre min''
Pola súa banda, o alcalde asegurou que as palabras que o locutor lle dedicou no programa 'La mañana', o 6 de xuño de 2006, son "o máis grave, inxurioso e ofensivo" que dixeron sobre el en toda a súa vida política. Gallardón asegurou que destinará todo o que cobre á Asociación de Vítimas do Terrorismo.

O presentador radofónico chegou a afirmar en 2006 que a Gallardón "danlle igual" as vítimas dos atentados, con tal "de chegar ao poder", pero no xuízo xustificou a súa diatriba porque cre que o alcalde tiña a vontade de pasar "páxina" e obviar toda a investigación respecto ao 11-M.

Para Losantos, Gallardón era "unha voz que facía claramente o xogo ao PSOE" por iso é polo que arremeteu contra el na radio, un medio onde "é practicamente imposible separar a opinión da información".

Losantos queda só
Máis aló de ver a un xornalista sentado no banco por inxurias ao alcalde de Madrid, o xuízo tivo outro foco de atención. Losantos citara como testemuñas da Defensa a figuras relevantes do Partido Popular tradicionalmente enfrontados a Gallardón, como Esperanza Aguirre, Ángel Acebes, Eduardo Zaplana ou Ignacio González.

Aínda así, todos eles lle deron as costas a Losantos ao asegurar que Gallardón non se negou a investigar sobre o 11-M ou que houbese mala fe nas súas palabras, polo que o único apoio do locutor foron os seus colegas xornalistas, Pedro J. Ramírez ou José Alejandro Vara.

Á saída do xulgado, Losantos afirmou que a actitude de Aguirre ou Acebes fora ''de caradura total e un exercicio de cinismo''.