Pel

Mike K. decidiu que a súa vida, e el mesmo, cabian nunha taquilla de autobús. Mike K. mide 1,68 metros e pesa 55 quilogramos, o que converte en factible acomodalo nunha taquilla de medio metro de ancho, sesenta centímetros de alto e noventa de fondo.

O okupa introdúcese decotío nunha caixa metálica ubicada na estación de autobuses de Düsseldorf porque soñaba con vivir nun lugar onde empezan milleiros de itinerarios. O planeta Terra non deixa de ser unha descomunal nave que faría as delicias dos guionistas de 'Star Treck' no caso de ser artificial.

Mike K. padece un afán de ser levado de viaxe sen importar o destino. O seu apelido kafkiano lémbrame un conto do escritor alemán no que un trapecista que se despraza nun tren. Sufre unha crise existencial do que acouga subindo ao gardamaletas do seu vagón. Mike K. é tamén un artista da sobriedade que un día reflexionou sobre o lugar no que quería vivir. Se leva nove anos residindo nesa solución habitacional é porque decidiu ir eliminando as cousas das que podía desprenderse mantendo o seu nivel de felicidade.

Quitando e quitando, reparou en que quedar coas cousas imprescindibles permitíanlle vivir nunha taquilla. Acadar a sabedoría de que todo o importante está baixo a pel énos negada a moitos.