Un total de 261 profesionais de 28 compañías e 30 espectáculos distintos aspiran aos galardóns da XVI edición dos premios de teatro María Casares.

A Asociación de Actores e Actrices de Galicia, que convoca estes galardóns, dará a coñecer o próximo xoves día 1 de marzo o nome dos finalistas. Os premios entregaranse o día 3 de abril nunha cerimonia que se celebrará no Teatro Rosalía de Castro da Coruña

As categorías da décimo sexta edición dos Premios de Teatro María Casares son: mellor maquillaxe, mellor vestiario, mellor iluminación, mellor música orixinal, mellor adaptación- tradución, mellor texto orixinal, mellor escenografía, mellor actriz secundaria, mellor actor secundario, mellor actriz protagonista, mellor actor protagonista, mellor dirección e mellor espectáculo. A estes hai que sumar o Premio de Honra María Soto, que recoñece a traxectoria ou un especial labor de promoción do teatro.

Os Premios María Casares distinguen o traballo dos profesionais e das distintas producións realizadas en lingua galega; neste caso da XVI edición as estreadas entre o 1 de xaneiro e o 31 de decembro de 2011.