Nin para diante nin para atrás: a reforma do voto emigrante non anda. O BNG di que non volve á ponencia parlamentaria pola pasividade de socialistas e populares, mentres que os outros din que sen nacionalistas non retoman a ponencia. A situación está moi tensa entre os cónxuxes do bipartito despois do que o BNG denunciase que hai un acordo entre PSdeG e PP para aproveitarse do delicioso pastel do voto emigrante.

O portavoz do grupo parlamentario do BNG, Carlos Aymerich, aseguraba que "PSOE e PP queren seguir traficando co voto emigrante" e que o seu partido "non vai deixar que o fagan impunemente". Por iso cren os nacionalistas que a ponencia foi parada, "pretenden que non se faga nada" para que se manteña a situación do sistema de votación dos emigrantes.

"Non queren entrar en determinados temas como a posibilidade de crear unha circunscripción para os emigrantes ou de limitar o dereito ao voto, nin que Galicia poida perder escanos no Congreso dos Deputados", dixo Aymerich, e acusounos de estar unicamente interesados en "seguir aproveitando os sufraxios no exterior".

Touriño pola súa parte pediulle a Aymerich que rectifique as súas acusacións, e insistiu en que a política non se fai "a base de quentóns". O bipartito non pasa precisamente polo seu mellor momento, de feito o presidente da Xunta non quixo valorar as declaracións de Aymerich, "se entro tería que dicir cousas demasiado grasas, non quero entrar". 

Voto en braille e no estranxeiro
Mentres tanto, onte aprobábase en Madrid unha modificación da Ley Orgánica do Réxime Electoral Xeral (LOREG) que permitirá ás persoas cegas exercer o seu dereito ao voto mediante o sistema braille. Unha reforma que probablemente se aplique nas próximas eleccións xerais de 2008, e que facilitará a posiblidade de votar ás persoas que se atopen no estranxeiro temporalmente entre a convocatoria do proceso electoral e a súa celebración.

Isto significa que a reforma que se ratificará o vindeiro xoves, facilitará o dereito ao voto de estudantes Erasmus, profesionais da flota pesqueira ou das Forzas Armadas. Tamén se aprobou outro cambio máis, que é o da publicitación da relación definitiva de seccións, mesas e locais en internet e non na prensa, como se facía ata agora. Unha modificación que supón un aforro de 2 millóns de euros.

Sobre esta reforma, o nacionalista Carlos Aymerich recoñeceu os efectos positivos da decisión adoptada no Congreso dos deputados, aínda que precisou que "esa vontade non chega para limpar a sobra de dúbida" que planea sobre o voto emigrante.