O ministro do Interior, Jorge Fernández Díaz, rexeitou hoxe a oferta de diálogo "directo" lanzada hoxe por ETA e advertiu de que o Goberno nin negociou, nin negocia, nin negociará coa banda terrorista, á que esixiu que se disolva de forma incondicional e entregue as armas.

Durante unha intervención no pleno do Congreso na que estaba a responder a unha interpelación de Amaiur sobre a situación dos presos de ETA, Fernández Díaz referíase así ao anuncio da banda de que designou unha delegación para o "diálogo directo" cos gobernos de España e Francia, nun comunicado enviado á axencia AFP.

"Para entregar as armas non fai falta o diálogo", subliñou o titular de Interior, que deixou claro que ETA xa non condiciona os pasos do Goberno nin tampouco "as nosas vidas".

Fernández Díaz insistiu en que o Executivo non necesita "verificadores" internacionais para comprobar que ETA se disolve e entrega as armas porque lle basta -dixo- coa Policía e a Garda Civil.

"Dígallo vostedes aos dirixentes de ETA, dígallo", pediulle o ministro do Interior ao deputado de Amaiur Iñaki Antigüidade.

Neste sentido, Fernández Díaz preguntouse por que os comunicados propagandísticos de ETA coinciden sempre coas intervencións de Amaiur, coma se fosen "as follas dun mesmo libro".

Insistiu en que a "única comunicación" que espera de ETA é o anuncio da súa disolución incondicional despois de que o pasado 20 de outubro asegurase que abandonaba a violencia para sempre.