O programa de axudas para a banca española de ata 100.000 millóns de euros abonarase en catro prazos e terá un vencemento máximo ata o ano 2028, segundo revela o semanario alemán Der Spiegel na súa próxima edición.

A revista basea as súas informacións nunha proposta confidencial dos responsables do Fondo Europeo de Estabilización Financeira (FEEF) á que tivo acceso.

Engade que a proposta da dirección do FEEF contempla o pago dun primeiro prazo antes de finais de xullo por valor de 30.000 millóns de euros.

Dúas terceiras partes dese primeiro prazo serán destinadas a inxectar capital nos bancos afectados no caso de que o necesiten a curto termo, mentres o terzo restante servirá de colchón "de seguridade" a longo prazo.

Der Spiegel explica que outros tres prazos de 15.000 millóns de euros de axudas cada un serán entregados a mediados de novembro próximo, a finais de decembro de 2012 e a finais de xuño de 2013.

A revista revela igualmente que para finais de novembro está prevista a creación en España dun "banco malo" para "valores problemáticos" que será dotado dun capital de 25.000 millóns de euros.

Finalmente, destaca que a proposta da dirección do FEEF establece que esas axudas non gravarán directamente ao Estado español para que "poida continuar tendo acceso aos mercados financeiros".