A Asociación Galega de Apicultura (AGA) culpa aos pesticidas da desaparición das abellas en Galicia, un problema que, segundo alertan, afecta a determinadas zonas da nosa comunidade dende 10 anos atrás.

Os apicultores denuncian que as fumigacións levadas a cabo en colleitas e plantacións provocan a morte das abellas por intoxicación. O contaxio pode ser de xeito agudo -se o insecto entra nunha nube tóxica trala pulverización- ou crónico -por contacto repetido con este tipo de produtos, a través das sementes, o néctar ou o pole.

Historia dunha desaparición
As primeiras zonas afectadas en Galicia, segundo lembra AGA, foron zonas de horticultura, dez anos atrás. A morte destes insectos coincidiu coa aparición do mercado dunha nova xeración de pesticidas sistémicos neurotóxicos. En terreos hortícolas, "xa desapareceron a maior parte das abellas, entre o 50% e o 90%".

Hai catro ou cinco anos, comezou o problema en zonas gandeiras, coincidindo coa aparición e uso de sementes de millos tratadas con estes mesmos pesticidas. Nestas zonas, a Asociación Galega de Apicultores estima que desapareceu arredor da metade da poboación de abellas.

Nos últimos tempos, tamén se están a ver afectadas zonas de monte, preto de cultivos de trigo e centeo e de plantacións de eucalipto, tamén tratados con pesticidas neurotóxicos.

Plataforma Alerta
Para facer fronte a esta situación, AGA proponse crear unha plataforma que una a distintos colectivos na loita "en defensa das abellas, a saúde e o medio ambiente". A Asociación de Apicultura lembra que segundo a FAO, o 40% da alimentación depende das abellas, xa que o 80% das plantas precisan ser polinizadas para dar froitos, proceso no que as abellas cumpren un papel fundamental.

Propoñen a retirada do mercado destes pesticidas químicos e citan antecedendentes: "en Francia xa prohibiron o emprego destes fitosanitarios no tratamento de sementes de xirasol, colza e millo no ano 2004 e no inverno pasado notaron unha importante melloría".

Queren promover ademais unha "nova apicultura, que esixe un medio ambiente san". Insisten en que o uso de fitosanitarios na agricultura fai perigar a pervivencia das abella e que as técnicas de cultivo "deben evolucionar cara a prácticas máis respectuosas co medio ambiente".