A folga dos traballadores de parques e xardíns de Vigo quedou desconvocada este mediodía, despois dunha reunión entre representantes dos sindicatos e da empresa concesionaria do servizo Cespa. Finalmente houbo acordo entre ambas partes, facilitada pola mediación do delegado provincial de Traballo, Pedro Borrajo.

Xa durante a mañá, os traballadores accederon a cumprir os servizos mínimos" como mostra de boa vontade" logo de que a empresa concesionaria do servizo accedese esta mañá a retirar as sancións a sete traballadores a cambio desa condición.

O acordo ó que chegaron sindicatos e empresa terá que ser ratificado agora nunha asemblea. Está previsto que ó longo desta tarde continúen as labores de limpeza do lixo acumulado no paseo marítimo e nos xardíns da praia viguesa de Samil.

Condicións do convenio
O convenio colectivo dos 109 empregados de Cespa terá unha duración de 4 anos e contempla un incremento lineal dos soldos de 55 euros mensuais este ano, 61 euros mensuais en 2008, 64 en 2009 e 67 ó mes en 2010.

O acordo tamén recoñece o dereito a cobrar unha cuarta paga extraordinaria completa en 2010, cobrando xa en 2007 o 25% desa paga; o 50% en 2008 e o 75% en 2009.

Cinco días de paro laboral
Deste xeito ponse fin a un paro que comezou o pasado luns, cando os traballadores da limpeza de parques e xardíns de Vigo e Cespa decidiron protestar pola falta de acordo na negociación dun convenio propio. O conflito acadou o seu maior punto de tensión no día de onte, xa que o lixo comezaba a acumularse nas zonas máis turísticas da cidade.

Os empresarios hostaleiros queixábanse de que a folga do servizo de limpeza lles estaba a ocasionar maiores prexuízos que o mal tempo, e pedían unha resolución ao conflito. O alcalde de Vigo, Abel Caballero, solicitou onte un informe á Consellería de Sanidade para saber se era necesario proceder á clausura da praia de Samil, por posible insalubridade, ante as dez toneladas de lixo que xa se acumulaban na zona peonil.