O vicepresidente da Xunta, Anxo Quintana, anunciou hoxe en Allariz (Ourense) que o banco de terras galego estará “plenamente operativo” en todo o país o vindeiro outono.

Na súa visita á zona de aproveitamento gandeiro do monte de Penamá, en Allariz, Quintana asegurou que a partires de setembro porase en marcha a fase de mobilización e arrendamento de terras agrarias en toda Galicia.

Acompañado polo conselleiro de Medio Rural, Alfredo Suárez Canal, Quintana subliñou que o obxectivo inmediato do banco de terras é a integración de 10.000 hectáreas de terra abandonada e improdutiva antes de final de ano. A consellería procedeu tamén á fixación de cinco zonas piloto de especial dinamización.

En Coruña fixouse unha zona entre as comarcas de Ordes e Xallas, outra na Terra Chá lucense, unha terceira na Limia ourensá e por último, outras dúas en Deza e Valmiñor, Pontevedra, en función da demanda existente e do peso socioeconómico das actividades agrogandeiras nestas zonas.