Apple presentou esta tarde o seu novo iPod Touch, cun deseño case igual co xa famoso iPhone: unha grande pantalla táctil e a mesma interface que a que ten o teléfono de Apple para reproducir cancións, pero o dobre de delgado que este, só uns 8mm de ancho.
A novidade máis impactante en canto a funcionalidade no iPod Touch é a tecnoloxía sen redes Wifi que incorpora. Isto permitirá ó afortunado posuidor do novo trebello navegar por internet, utilizando a mesma versión portátil do navegador Safari que o iPhone.
O novo iPod ven en dous modelos: un con 8Gb de capacidade, por 299 dólares e outro co dobre de espazo por 399$.
Para os que prefiran o deseño de toda a vida, ou queiran levar unha colección de música realmente desmesurada no seu dispositivo portátil hai outra versión do iPod, chamada Classic, que conserva a tradicional 'rodiña' selectora, e que se poderá atopar nas tendas en dúas versións: unha de 80Gb que custará 249 dólares, e outra de 160Gb por 349.
Renovación en toda a familia
O Touch non é a única novidade que presentou o tío Jobs nesta 'keynote', celebrada en San Francisco. Os iPod Nano teñen finalmente o mesmo aspecto que ofrecían nas fotos difundidas en días previos pola rede. O deseño é metálico e veñen en 5 cores. Son tamén moi finos, e teñen unha capacidade de 4 e 8 gb. Como principal novidade inclúe a capacidade de ver vídeos e executar xogos.
O irmán máis pequeno da gama, o iPod Shuffle, tan só oferta novas cores. Unha delas é a vermella, e parte dos beneficios das súas vendas están destinados a programas de axuda a África
iTunes
A tenda de Apple tamén cambia, para adaptarse ós novos iPods. Poderase acceder a ela mediante o iPod e o iPhone, a través da aplicación iTunes Wifi Store. E incorpórase ademais a posibilidade de crear tonos para móbil, recortando a música dun repertorio de máis de 500.000 cancións
05/09/2007
Actualidad