O Centro Dramático Galego (CDG) abrirá a súa nova tempada escénica coa estrea do espectáculo 'Noite de Reis', de William Shakespeare, baixo a dirección e dramaturxia de Quico Cadaval.

A compañía pública dirixida por Cristina Domínguez comezará o curso o vindeiro 28 de setembro no Salón Teatro de Santiago con esta nova obra, segundo informou hoxe o Instituto Galego de Artes Escénicas e Musicais (IGAEM) no seu boletín.

Deste xeito, o coñecido contacontos, actor e adaptador teatral enfróntase por primeira vez ao autor de 'Romeo e Xulieta'. Concibida como unha comedia romántica, 'Noite de Reis' arranca co naufraxio de Sebastián e Viola, irmáns xemelgos, diante da costa de Iliria.

O reparto conta con 15 intérpretes, entre os que se atopan Rebeca Montero, Borja Fernández, Simone Negrin, Marcos Correa, María Bouzas, Susana Dans, Marcos Orsi, Xan Cejudo, Xosé Manuel Olveira 'Pico' e Víctor Mosqueira, entre outros.

A peza permanecerá no Salón Teatro compostelán ata o vindeiro 21 de outubro, con cinco funcións semanais, de mércores a domingo. A continuación iniciará unha xira por distintas localidades galegas ata decembro de 2007.

Nove meses de teatro
Ao longo dos vindeiros nove meses, o CDG ten previsto un programa que inclúe a montaxe de tres producións propias, unha coprodución e unha nova campaña de difusión. Asemade, continuará con proxectos como o obradoiro de dramaturxia e a programación externa do Salón Teatro.

Dentro das accións a prol do desenvolvemento dramático contemporáneo galego, estrearanse os espectáculos 'Valdemuller', de Xosé Antón Neira Cruz, en febreiro de 2008, e 'DramaA3', coordinado por Daniel Salgado, que se poderá ver a partir de abril.

O CDG emprenderá nesta nova etapa unha campaña de comunicación social para acadar a máxima difusión do traballo e dos servizos do CDG, baixo a denominación 'Espazos CDG'.