O álbum As Serpes Cegas, editado por BD Banda, conta con tres candidaturas nos Premios da Crítica 2009. A obra do mallorquín Bartolomé Seguí e do valencián Felipe Hernández Cava opta a recibir os galardóns a 'Mellor obra nacional', 'Mellor debuxante nacional' e 'Mellor guionista nacional'.

Os premios da crítica, convocados pola revista Dolmen, recollen anualmente as preferencias de críticos e especialistas de BD de todo Estado, e están unanimemente recoñecidos entre os máis prestixiosos, canda o Premio Nacional do Cómic e os premios do Saló del Cómic de Barcelona.

Precisamente, As Serpes Cegas xa fora recoñecida nesta última cita, no pasado mes de maio, cos galardóns á mellor obra e ao mellor guión. O álbum quedara tamén finalista nos premios que outorgan os libreiros franceses e colleitou unha crítica unanimamente positiva en medios especializados de todo o país.

En galego, en castelán e en francés
As Serpes Cegas é a primeira BD editada por BD Banda e viu a luz en galego e castelán ao tempo que a edición francesa do xigante editorial Dargaud, mercé a un acordo desta empresa co colectivo galego. A obra xa fora publicada por entregas na revista BD Banda, que en breve tirará o seu cuarto número do prelo.

A entrega dos premios da crítica farase no acto de clausura das Xornadas do Cómic de Avilés, o 12 de setembro. Os críticos teñen agora aberta unha segunda rolda de votacións que remata o 4 de outubro para seleccionar os gañadores.