Segundo Chiu Longina, membro do proxecto 'Escoitar.org', estámonos a converter en robots. Unha das causas -segundo este colectivo de artistas, antropólogos e musicólogos- é a xerarquía dos sentidos, xa que dende a invención da imprenta, o ollo veu mantendo unha hexemonía clara con respecto á orella. ''O mesmo hemisferio cerebral que se encarga de procesar os aspectos cualitativos da experiencia humana, o que nos fai máis humanos, é o mesmo que se encarga de procesar o audio, fronte ao outro hemisferio, que se encarga da lóxica e do visual'', explica Chiu.

Ante estas circunstancias, os 'escoitadores' denuncian a existencia dunha ''relación entre ese malestar que aflora en Occidente agora co exceso de loxicismo'' e chaman á promoción da escoita para ''ser mellores persoas''.

Un micrófono xigante para captar a paisaxe acústica
Reivindicar a importancia do oído non ten por que significar o abandono da vista. De feito, o colectivo emprega un micrófono xigante como reclamo visual para chamar a atención sobre as súas actuacións. ''Usamos o ollo para fomentar o oído'', explica Chiu.

O micrófono xa percorreu moitos puntos captando o son ambiente deses lugares. Dende a súa páxina -ca mesma dirección que o seu nome-, os usuarios poden escoitar as gravacións de ambiente dunha aldea abandoada en Toques (A Coruña), pasando por Bos Aires ata o Círculo de Bellas Artes de Madrid e mesmo Alemaña. Ademais, poden aportar eles mesmos os seus sons, configurando unha ampla colección de aproximadamente 900 sons, xestionados mediante licenza 'Creative Commons'. Un software creado a partir da API (a interfaz de programación de aplicacións) de Google Maps permite visualizar xeográficamente o resultado: ''que se configure entre os propios oíntes o que é o patrimonio sonoro de Galicia''.

''Esculturas escoitadoras'' e turistas curiosos
Decididos a realizar un mapa sonoro de Compostela, os membros de Escoitar.org comezaron a súa tarefa co que eles chaman unha ''escultura escoitadora''. Durante uns 10 minutos, os compoñentes permaneceron inmóbiles e ca boca tapada con esparadrapo, escoitando. No punto de partida, a praza do Toural, os turistas miraban curiosos a performance e moitos preguntaban: ''Y estos, ¿por qué protestan?''. Algúns simplemente aproveitaban para sacarse unha foto co micrófono xigante.

Unha vez finalizada a 'escultura', os artistas comezan o paseo polo casco vello da cidade carrexando o micrófono pola rúa do Villar ata a Quintana. Esta vez, os turistas curiosos que se achegaban a preguntar podían experimentar cos seus propios oídos a captación de sons mediante uns cascos que os 'escoitadores' lles deixaban. O son das campás da Catedral, un músico da rúa tocando o seu instrumento ou mesmo unha discusión entre unha familia de turistas andaluces decidindo a que parte de Compostela dirixirse. Todo iso forma parte xa do mapa sonoro da cidade.