O presidente fundador do PP, Manuel Fraga, apostou pola alcaldesa de Valencia, Rita Barberá, para a dirección popular nesa comunidade e non descartou a formación dunha xestora para o partido en Madrid.

En declaracións á cadea Ser, e segundo un comunicado da emisora, Fraga dixo sobre o actual presidente do PP na Comunidade Valenciana, Francisco Camps, que non sabe ''se repetirá como candidato do PP, porque, non en balde, houbo traxes arriba e traxes abaixo. Traxinouse demasiado''.

Tras defender que o seu partido está a resolver ben os seus problemas internos, mostrouse preocupado polos ''personalismos'', especialmente no seo do PP de Madrid, onde non descarta unha xestora se persiste o enfrontamento coa dirección nacional: ''eu non descarto nada -dixo- porque a unidade do partido está por encima de todo''.

O líder en Madrid
Aínda que deixou claro que non discute o liderado do presidente nacional do PP, Mariano Rajoy, sinalou que con el á fronte do partido o conflito entre a presidenta madrileña, Esperanza Aguirre, e o alcalde da capital, Alberto Ruiz-Gallardón, ''xa estaría resolto''.

A pesar da súa proximidade e afecto nunca ocultados por Ruiz-Gallardón, Fraga manifestou que as palabras do vicealcalde de Madrid, Manuel Cobo, ante o Comité Executivo Nacional do pasado martes foron ''intolerables''.

''En lugar de dar explicacións polo que fixera anteriormente, insultando a unha persoa (nunha entrevista publicada unha semana antes polo diario El País), meteuse en acusacións non probadas. Foi lamentable o seu informe, a min non me gustou nada'', declarou.