Máis aló dos graves problemas que provoca na falta de substitución xeracional, o envellecemento da poboación galega tamén está a ter o seu efecto nas arcas públicas. Dous claros exemplos son o pago de pensións e o gasto farmacéutico, que aumentan de forma progresiva a medida que se incrementa a porcentaxe de maiores.

Segundo os datos dos ministerios de Traballo e de Sanidade, o pago das pensións de xubilación supón un gasto mensual medio en Galicia de 310 millóns de euros, mentres que o desembolso en fármacos supera os 80 millóns ao mes.

O avellentamento de Galicia é especialmente preocupante nas provincias do interior, xa que ambas superan xa os 95.000 maiores de 65 anos. En todo caso, a porcentaxe de persoas por encima da idade teórica de xubilación é superior en Ourense, xa que ten menos poboación que Lugo.

Así as cousas, Galicia atópase entre as comunidades máis envellecidas de España. A caída na natalidade dos últimos anos, as migracións a outras partes de España ou o menor impacto da inmigración --que se centrou sobre todo no Levante e en Madrid-- explican o aumento da idade media na comunidade.

A maior parte das persoas en idade de xubilación en Galicia son mulleres, que representan un 58% dos galegos de máis de 65 anos. A medida que se incrementa a franxa de idade, as diferenzas por xénero son aínda maiores, algo que se explica porque a esperanza de vida feminina supera á masculina.