Coa intención de apoiar a música en galego e contribuír a súa difusión, os organizadores do 'Correlingua' e o portal de música galega 'Komunikando' convocan o consurso Cantalingua, no que todos os grupos e solitas poden presentar temas en galego ata o 10 de abril.

O concurso musical está ideado polas entidades organizadoras do Correlingua, a Asociación Socio-Pedagóxica Galega (AS-PG), CIG-Ensino, A Mesa pola Normalización Lingüística e os concellos de Lugo, Pontevedra, Santiago e Vigo, en colaboración co portal de música en galego Komunikando.net.

O Cantalingua non ten límite en canto a estilo musical, nin tampouco no que se refire ao número de persoas, poden ser solistas ou grupos, o único que se require para participar é que os temas presentados sexan en galego.

O premio
Os grupos vencedores do concurso serán galardoados coa oportunidade de facer concertos, 11 actuacións para o Correlingua 2010, que serán repartidas entre as tres primeiras bandas ou solistas participantes. Ditos concertos terán lugar entre os días 3 e 14 de maio de 2010, e contarán cunha remuneración económica de 700 euros por actuación.

Os gañadores serán elixidos baixo un sistema mixto de votación popular vía Internet, e máis un xurado integrado por persoas vinculadas dunha ou outra maneira ao difícil mundo da música. Os nomes dos gañadores serán coñecidos ao redor do día 15 de abril.