A triunfadora do audiovisual galego foi Un franco, 14 pesetas, a película de Carlos Iglesias que recibiu 6 premios Mestre Mateo. Na gala celebrada esta noite, o filme acadou algúns dos galardóns máis codiciados, como o de mellor longametraxe ou guión. A súa protagonista, Isabel Blanco, tamén recibiu o recoñecemento á mellor intérprete.

O cine de animación tivo un papel destacado na festa do audiovisual galego, como o está a ter no conxunto do sector en España. Así, De Profundis, a película de Miguel Anxo Prado recolleu 4 estatuíñas, entre elas a de mellor dirección para o debuxante de cómic. Nani García, autor da banda sonora, tamén tivo o seu galardón.

A gala celebrouse no Teatro Colón, na Coruña, onde se deron cita os rostros máis populares da televisión e do cine galegos, dende Luís Tosar, que tamén recolleu o seu Mestre Mateo como mellor intérprete, a protagonistas das series máis exitosas da TVG, como A vida por diante. Unha gala fría e moi rápida, marcada pola présa que nos últimos anos caracteriza a estas cerimonias. Nada de boato: ao que vimos todos é polos premios.

Premios Mestre Mateo 06

• Mellor longametraxe: Un franco, 14 pesetas, de Adivina Producciones e Drive Cine.
• Película tv: O partido, de Vaca Films.
• Programa tv: A Casa de 1906, de Filmanova S.L. e Continental Producciones.
• Serie tv: A vida por diante, de Voz Audiovisual.
• Documental: 2050, de TV Siete.
• Produción Interactiva: www.deprofundislapelicula.com, de Interacción e Continental.
• Produción de publicidade: Las noticias del guiñol.
• Curtametraxe de fición: Cicatrices, de Mr. Misto Films.
• Curtametraxe de animación: A Bruxa Catuxa, de Grándola Nova.
• Dirección de produción: Jesús Alonso, por Un franco, 14 pesetas
• Dirección de fotografía: Ricky Morgade, por O partido
• Maquillaxe e Perruquería: Sara Márquez e Óscar Aramburu, por Un franco, 14 pesetas
• Deseño de vestiario: Ana López, por A Casa de 1906.
• Dirección artística: Curru Garabal, por Mia Sarah.
• Montaxe: Mario Iglesias, por De Bares.
• Son: Nani García e Javier Ferreiro, por De Profundis.
• Guión: Carlos Iglesias, por Un franco, 14 pesetas.
• Banda Sonora: Nani García, por De Profundis.
• Dirección: Miguel Anxo Prado, por De Profundis.
• Realización: Carlos Sedes e Manuel A. Espiñeira, por A Vida por diante.
• Comunicador tv: Paco Lodeiro, por Cifras e Letras.
• Interpretación masculina protagonista: Luís Tosar, Cargo.
• Interpretación feminina protagonista: Isabel Blanco, por Un franco, 14 pesetas.
• Interpretación masculina secundaria: Antonio Durán, Morris, por O partido.
• Interpretación feminina secundaria: Rosa Álvarez, por De Bares.