A celebración do 5 de xuño como Día Mundial do Medio Ambiente foi establecida pola Asemblea Xeral das Nacións Unidas en decembro de 1972 co claro obxectivo sensibilizar a nivel planetario a conciencia dos seres humanos no respecto ao entorno, á vez que se pretende que as forzas políticas expoñan algunha resposta aos problemas ambientais.

Desde diversas institucións promoveuse nos últimos anos a celebración da Semana do Medio Ambiente (que é aquela en a que se integra o propio 5 de xuño), sete días nos que se suceden diversos actos públicos coa natureza como pano de fondo. Desde Galicia, Sogama presentou este venres o seu programa de actividades para esa semana, que este ano é a que decorre entre os días 31 de maio e 6 de xuño.

A programación de Sogama para este evento está relacionada cun dos proxectos que comezou a desenvolver desde hai uns meses: a compostaxe doméstica. Desta forma, para conmemorar a Semana do Medio Ambiente, a empresa pública autonómica realizará as 'IV Xornadas de Portas Abertas'  ás que invitou aos veciños dos cinco concellos da Mariña luguesa que están a participar desa iniciativa a coñecer as instalacións do Complexo Ambiental de Cerceda. Eses cinco municipios son Barreiros, Alfoz, Trabada, Lourenzá e Cervo.

A cidadanía achégase a Sogama
O presidente de Sogama, Luís Lamas, sinalou que con estas xornadas de portas abertas ''queremos que a cidadanía vexa cos seus propios ollos o que facemos co lixo de cada un de nós'' co obxectivo de que sexan os propios veciños os que ''desde a obxectividade e o coñecemento valoren a nosa actividade''. Así, segundo indican as enquisas que os visitantes á planta de incineración enchen tras as súas visitas, ao redor dun 90% afirman atoparse satisfeitos co labor de Sogama.

Por outra banda, Lamas tamén insistiu en que ''se aplicamos correctamente a estratexia dos tres erres conseguiremos diminuír en boa medida a cantidade de desperdicios que se envían a Sogama''. Con esta redución virían ''importantes beneficios ambientais e sociais, derivados da menor frecuencia de recollida e transporte de lixo, ademais de económicos para as arcas locais'', afirma o presidente de Sogama.

Lamas engadiu que para o tratamento dos materiais non reciclables Sogama ''dispón de tecnoloxía e medios que posibilitan que este se realice conforme á normativa vixente''. Así, afirmou que os datos sobre os niveis de emisión están ''moi por baixo dos límites legais''.

Compostaxe doméstica
O programa de compostaxe doméstica que Sogama está a levar a cabo iniciou a súa andaina este ano 2010, co obxectivo de que a cidadanía puidese coñecer os beneficios deste proceso. Así, a empresa pública clasifica en tres vertentes estes efectos beneficiosos. Primeiro, desde o punto de vista ambiental, xa que levaría menos lixo aos colectores e isto implicaría unha redución no transporte do lixo, é dicir, menos emisións de CO2 á atmosfera.

Desde o punto de vista económico, ao entregarse menos lixo a Sogama os concellos tamén verán reducido o importe que deben pagar a este organismo polo seu servizo. Para rematar, Sogama destaca tamén que a comodidade que suporá para os veciños ter en casa os medios necesarios para desfacerse dunha forma ecolóxica da metade dos desperdicios xerados. A todo isto hai que sumar que ao transformarse a materia orgánica en compost terase disposición dun abono natural.

200 vivendas
No proxecto de compostaxe doméstico participan unhas 200 vivendas rurais que se reparten do seguinte modo: 50 en Barreiros, 41 en Alfoz, 49 en Lourenzá, 30 en Trabada e outros 30 en Cervo. Estes cinco concellos foron escollidos tras un estudo de viabilidade no que se tiveron en cantas variables como o interese das familias, as unidades poboacionais, as vivendas principais e de habitabilidade continua así como os puntos e frecuencia de recollida e o volume de residuos xerado.

Os compostadores, recipientes nos que se ha de botar a materia orgánica para a súa transformación en compost, que se repartiron entre tales fogares contan cunha capacidade de 400 litros. Éste debe colocarse no exterior da vivenda e en contacto coa terra, permitindo así o achegamento de microorganismos e a absorción do posible exceso de humidade.

Unha das figuras crave nesta iniciativa son os ''mestres composteiros'' que son os que se encargan do correcto desenvolvemento do programa tras recibir a oportuna formación. Así, os concellos participantes deben ter algunha persoa con este rango, que realiza labores de supervisión dos compostadores, á vez que asesora e motiva a impliación dos participantes. Para desempeñar este cargo, Sogama indicaba que esta debía ser unha persoa de confianza e coñecida no municipio.

A encargada de realizar estes cursos de formación foi a firma Ingesyma. Nestas clases prestouse especial atención á identificación de materiais a compostar, a descrición de proceso e factores que inflúen no mesmo, así como os problemas máis frecuentes e as súas solucións.

Visitas
Sogama invitou aos veciños dos concellos que participan do programa de compostaxe doméstica a visitar a planta de Cerceda durante os días de portas abertas para, ademais de premiar o seu esforzo, mostrar como os residuos non reciclables son sometidos a tratamento por outras vías á súa valorización enerxética, garantindo o respecto ao medio ambiente e a protección da saúde pública. Estas visitas sitúanse á marxe do programa habitual, no que participaron unhas 50.000 persoas nos últimos anos.

Por outra banda, a semana do medio ambiente de Sogama contará tamén coa visita dun grupo de estudantes e profesores da Universidade La Sapienza de Roma, entidade que participa en diversos proxectos de investigación coa Universidade de Santiago de Compostela.