A térmica das Pontes é a novena central eléctrica máis contaminante de Europa. Faino público WWF/Adena no seu informe 'As 30 centrais máis sucias' onde figuran as eléctricas que emiten máis dióxido de carbono á atmosfera. A térmica de Endesa é a única central española que figura entre as máis contaminantes do continente.

A clasificación está feita segundo os datos de 2006 do Rexistro Europeo de Emisións e Fontes Contaminantes (EPER) e analiza as emisións absolutas de dióxido de carbono das centrais. A maioría das eléctricas "sucias" atopámolas en Alemaña, Reino Unido, Polonia e Grecia, quen ostenta a triste victoria de posuír as dúas centrais máis contaminantes de Europa.

Adena lembra con este estudo que as emisións de dióxido de carbono son a causa principal do cambio climático. Lembra que en 2006 estas trinta centrais emitiron á atmosfera máis de 393 millóns de Toneladas métricas de CO2. Segundo a organización ecoloxista, o sector eléctrico é responsable dun cuarto das emisións de España.