A vila carballiñesa do Carballiño acollerá entre os días 7 e 10 de setembro o Festival de Teatro Galego 2010 (Fetega). A mostra, que celebra a súa sétima edición, terá unha duración de 3 días e desenvolverase no Centro Multifuncional carballiñés.

Varios grupos de teatro asistirán á mostra ao longo desta semana deixando pegada das mellores artes do panorama teatral galego. De feito, o Fetega foi cualificado este luns polo director xeral de Promoción e Difusión da Cultura, Francisco López, como "unha cita de referencia dentro da escena galega" que atrae a novo público e que serve para expandir a produción teatral galega a outros países e comunidades.

A compañía teatral Obras Públicas abrirá o martes o festival co seu espectáculo Life is a paripé, escrita e dirixida por José Prieto Álvarez e que ten como intérprete feminina a Iolanda Muiños. O segundo día os protagonistas serán Teatro de Ningures coa súa obra Homes...Mulleres, de Paula Carballeira, Santiago Cortegoso e María Armesto. Nut Teatro levará a escena o xoves 9 Wake up, escrita e dirixida por Carlos Neira.

O peche do Festival de Teatro Galego do Carballiño será presentada polo actor de Ribeira Josito Porto, quen será o encargado de presentar a V Gala dos premios Fetega no Multifuncional a partir das dez da noite.