A Biblioteca Pública Nodal de Lugo foi o escenario elixido para presentar unha exposición multimedia que se desprazará por Galicia para achegar aos lectores a vida e obra do poeta monfortino Lois Pereiro, autor homenaxeado este ano no Día das Letras Galegas.

A citada exposición, organizada polas consellerías de Cultura e Educación, coa colaboración do equipo 'Ouvirmos', estará en Lugo durante quince días. Posteriormente, iniciará un periplo que a achegará ás outras cinco bibliotecas nodales que hai en Galicia e a numerosos centros escolares da Comunidade.

A mostra está formada por unha pantalla táctil interactiva e un muro vertical multimedia, para permitir o acceso, de forma "dinámica e innovadora", aos contidos sobre a vida e obra do poeta, segundo informaron os promotores deste proxecto.

Na apertura desta exposición itinerante participaron o director xeral do Libro, Arquivos e Bibliotecas, Francisco López; o secretario xeral de Política Lingüística, Anxo Lorenzo; a directora da Biblioteca Pública Nodal de Lugo, Marisol González, e o irmán do poeta monfortino, o xornalista Xosé Manuel Pereiro.

Durante a súa intervención, Francisco López, cualificou a Lois Pereiro como o "gran poeta da Galicia urbana" e mostrouse convencido de que esta exposición multimedia pareceulle ao propio poeta "o formato máis acertado para reflectir a súa personalidade", porque sabía que "o mundo cambiara radicalmente e creara novos modelos de comunicación".

Xosé Manuel Pereiro recoñeceu que "Lois estaría contento de todo este 'rebumbio' que se está formando ao redor del". Segundo o seu irmán, aínda que non chegou a coñecer o "fenómeno de Internet, seguro que lle encantou", polo que "o feito de que a súa vida e o seu contexto formen parte dunha exposición deste tipo, gustaríalle".

Pereiro afirmou que o seu irmán non "contribuíu a encher as bibliotecas", porque só publicou dous libros en vida e unha obra póstuma. Con todo, tamén recordou que foi "un autor de culto", situado "fóra do sistema" e dos "cenáculos", que "esgotou unha edición de 1.500 exemplares" da súa primeira obra e "dúas de 1.000" da segunda.

Por iso, subliñou que é "emocionante e significativo" que a súa figura teña "este recoñecemento oficial", pero tamén por parte dos editores privados, porque se van publicar uns vinte libros e tres ou catro discos" sobre a súa vida e a súa obra.

De feito, Francisco López anunciou que os seus poemas serán traducidos ao inglés.