Lugo
Sen dúbida ningunha, a cidade dúas veces milenaria é o lugar onde as enquisas se moveron menos e onde todo o bacallau semella vendido, salvo que se dea unha viraxe insólita nesta última semana de campaña.

O efecto Orozco, ou síndrome, segundo os casos, prevalecería a teor das enquisas, permitíndolle ao PSOE manter cando non aumentar a súa maioría absoluta. O PP seguiría liderando a oposición.

Ferrol
Na cidade ilustrada as enquisas móvense como en ningures, e debuxan algunhas das variacións positivas e negativas máis claras de toda a Galiza urbana. Porén, o resultado que se agarda é, cualitativamente, o mesmo en todas as sondaxes.

Todas as enquisas coinciden en describir a perda da maioría absoluta por parte do goberno bipartito PP-IF. Quizá esa claridade nas expectativas é a que ten inducido fortes transferencias de voto ao longo dos últimos meses e mesmo semanas.

Eses movementos terían beneficiado enormemente ao PSOE e ao seu candidato, que máis que duplicarían o seu apoio electoral, de se materializar os prognósticos. A única dúbida que existe é, como en Pontevedra, como resultará o equilibrio de forzas nun máis que probable goberno tripartito.

Ademais, os efectos marxinais ou colaterais da marusía que azouta a ría ferrolá, poderían dar lugar mesmo a dous sorpassos: o de IU sobre o BNG e outro máis improbábel de IF sobre o PP.

Pontevedra
As enquisas realizadas na cidade do Lérez mostran, como en Lugo, moi poucas variacións entre elas. Todo indica que en Pontevedra non haberá maioría absoluta de ningunha forza, que o PP será a forza máis votada, seguida a pouca distancia do BNG e co PSdeG como terceira forza a bastante distancia.

Aínda que as sondaxes apuntan a que podería haber unha disputa pola vitoria, por gañar ou quedar en primeira posición, entre PP e BNG, todos os inquéritos coinciden en apuntar un maior desgaste da forza do alcalde.

Se a iso sumámoslle que en 2003 as sondaxes sobrevaloraron o resultado do BNG, darlle a volta a este dato semella complicado. En calquera caso, o goberno de coalición BNG-PSOE é o claro resultado destas eleccións nas que o que se decide é o reparto do poder entre as forzas progresistas.

Vilagarcía de Arousa
Un panorama semellante ao de Ferrol é o que encontramos no concellos máis populoso da Arousa, con 5 forzas políticas que teñen representación no concello e que esperan reeditala, e tamén cunha expectativa clara de goberno progresista.

Dentro deste escenario, as combinacións para formar maioría son aquí múltiples. O previsíbel descenso do apoio ao goberno do PSOE podería facer precisa non só a presenza do BNG senón o concurso dunha terceira forza, papel para o que IU tería, a priori, case todos os boletos.