Asuntos Internos cita a declarar ao mosso da "república non existe, idiota"

O axente protagonizou un vídeo que se fixo viral no que se refería así a un un membro independentista dos Axentes Rurais da Generalitat

A División de Asuntos Internos (DAI) dos Mossos d'Esquadra citou a declarar ao axente antidisturbios que o pasado 21 de decembro replicou a un axente rural que protestaba contra a celebración do Consello de Ministros en Barcelona coa frase: "a república non existe, idiota".

Segundo informou este mércores a Central Sindical Independente e de Funcionarios (CSIF), o axente da unidade antidisturbios dos Mossos d'Esquadra foi citado a declarar ante Asuntos Internos o vindeiro luns, 18 de febreiro.

Un vídeo que se fixo viral nas redes sociais captou o momento dun enfrontamento verbal entre un axente antidisturbios que integraba o dispositivo de seguridade do 21-D cun membro independentista dos Axentes Rurais da Generalitat que se estaba manifestando.

O axente rural instaba ao mosso a defender a República, ao que este último respondeu: "Que república nin que collóns. A república non existe, idiota".

A Generalitat anunciou tras ese incidente que os Mossos estudarían a actuación do axente antidisturbios, non por pronunciarse sobre a existencia ou non da república, senón polo insulto que dirixiu a un manifestante.
 

Comentarios