A ministra de Educación en funcións, Isabel Celaá, anunciou este luns a súa intención de implantar unha nova materia educativa que permita aos alumnos desenvolver a sensibilidade polo cambio climático e o desenvolvemento sostible.
En declaracións aos xornalistas á súa chegada ao Cume do Clima de Madrid, a ministra destacou a importancia dunha nova lei para que os alumnos "adquiran todo o coñecemento teórico-práctico que necesitan para desenvolver esa sensibilidade polo cambio climático e por un desenvolvemento sostible".
Preguntada sobre a necesidade de contar cunha nova materia para alcanzar este obxectivo, Celaá afirmou: "Teremos unha materia tamén".
A ministra de Educación participa na COP25 no acto Nenos e mozos ante o cambio climático, xunto á alta comisionada das Nacións Unidas para os Dereitos Humanos, Michelle Bachelet, e a directora executiva de Unicef, Henrietta H. Fore.
No acto estaba prevista tamén a intervención da moza activista sueca Greta Thunberg, quen non estaba presente ao comezo desta reunión.
