China pecha todos os transportes na cidade onde comezou o brote de pneumonía

Ata agora contabilízanse 17 mortes
Una pasajera china en Londres. EFE
photo_camera Una pasajera china en Londres. EFE

As autoridades chinesas decidiron este mércores pechar todos os transportes en Wuhan, cidade de 11 millóns de habitantes onde comezou o brote de pneumonía que ata o momento deixou polo menos 17 mortos, e impedir calquera saída da cidade "sen razóns especiais".

Nunha concisa circular publicada polo novo posto de mando para o control e prevención da pneumonía da cidade pasadas as 03.00 hora local (19.00 GMT do martes) establécese que a partir das 10.00 hora local (02.00 GMT) deste mércores, suspéndense o "transporte público urbano, o metro, o ferry e os transportes de pasaxeiros de longa distancia".

Así pois, o aeroporto e a estación de tren quedarán "temporalmente pechados" para saír da cidade e, de feito, prohíbese que ningún cidadán "saia de Wuhan sen razóns especiais" ata novo aviso.

A prohibición chega tan só un día antes do equivalente no calendario lunar chinés á Noitevella, xa que o vindeiro sábado celébrase o Ano Novo chinés, a principal época festiva do ano no país, na que millóns de persoas viaxan para reunirse coas súas familias.

Esta drástica medida ten como obxectivo, segundo o comunicado, "cortar de forma efectiva a transmisión do virus, conter con determinación a inercia da propagación da epidemia e garantir a seguridade das vidas e a saúde da xente".

O Goberno da cidade tamén emitiu un bando na que establece a obrigación de levar máscara en lugares públicos; o persoal das institucións públicas tamén deberá levala durante as súas horas de traballo.

Esta mesmo mesmo mércores, as autoridades da provincia centro-oriental de Hubei, da que Wuhan é capital, elevaran o número de casos confirmados na rexión a 444, e o de mortes a 17 -polo momento non se confirmaron falecementos noutras provincias-.

Estas cifras, que soamente corresponden á citada provincia, xa son superiores ao balance a nivel nacional que ofrecera a Comisión Nacional de Sanidade o martes pola mañá.

Na páxina oficial da citada Comisión aínda non se actualizou o balance nacional, aínda que un conteo levado a cabo polo diario estatal Global Times fala dun total de 544 casos en toda China. Tamén se detectaron casos ata agora en Tailandia, Xapón, Taiwan, Corea do Sur e Estados Unidos.

Na popular rede social Weibo, o equivalente chinés de Twitter, a etiqueta máis comentada era "Wuhan, cidade pechada", e a maioría de tendencias versaban sobre a xa coñecida como pneumonía de Wuhan, provocada por un novo tipo de coronavirus similar ao da síndrome respiratoria agudo e grave (SARS), enfermidade que deixou máis de 600 mortes en 2003.

Horas antes de que se anunciase a prohibición sobre o transporte en Wuhan, o diario estatal China Daily publicara un editorial no que aseguraba que "se é necesario, as viaxes desde a cidade han de ser prohibidos" para tratar de conter a propagación do virus. 

Comentarios