As comunidades esperan a resolución de Sanidade sobre as fases ► ¿Que pide cada unha?

Galicia é unha das autonomías que solicitou que todo o seu territorio pase á fase 2, mentres que Madrid, Barcelona e parte de Castela e León demandan entrar na 1 e a Comunitat Valenciana aposta por quedar nesa. O Goberno madrileño ve con optimismo a opción do seu avance na desescalada tras a reunión co ministerio
El ministro de Sanidad y la vicepresidenta Teresa Ribera mantienen una videoconferencia con el consejero de Sanidad de Madrid. EP
photo_camera O ministro de Sanidade e a vicepresidenta Teresa Ribera manteñen unha videoconferencia co conselleiro de Sanidade de Madrid. EP

A rolda de reunións bilaterais entre o Goberno e as comunidades autónomas para avanzar no plan de desescalada concluíu este xoves cos encontros con Andalucía, Valencia, Cataluña, Madrid e País Vasco, segundo informou o Ministerio de Sanidade. 

Agora analizarase a documentación técnica presentada e este venres darase a coñecer a decisión que adopte o Ministerio de Sanidade, cuxo titular Salvador Illa, presidirá a comisión interministerial cos conselleiros do ramo. O que pide Galicia é pasar á fase 2, ademais de reiterar a demanda de que se posibilite a mobilidade entre as provincias galegas

Ademais, a Xunta presentou unha alegación en relación coas visitas ás residencias de maiores e persoas con discapacidade, cuestión para a que asegura que elaborou un "estrito protocolo", que poderá ser incluído por cada comunidade na fase dúas, segundo confirmou o ministerio.

Illa e a vicepresidenta cuarta e ministra para a Transición Ecolóxica e o Reto Demográfico, Teresa Ribera, presidiron as reunións deste xoves, nas que a Comunidad de Madrid solicitou o seu paso á fase 1, e Andalucía e País Vasco, á 2. 

Cataluña pediu que as zonas sanitarias de Terres de l'Ebre (Tarragona), Camp de Tarragona e Alt Pirineu-Aran (Lleida), que se atopan en fase 1 desde o 11 de maio, pasen á 2. Para o resto solicitou progresar á 1. 

Pola súa banda, o vicepresidente da Junta de Castilla y León, Francisco Igea (Cs), recoñeceu este xoves unha "pelexa dura" co ministerio pola forma en que desescalará esa comunidade, que ten parte do territorio na fase 0 e outras zonas na 1. O Goberno rexional quere unha mestura de avances por provincias e zonas básicas de saúde, que o departamento de Salvador Illa prefire unificar, segundo Igea. 

Galicia volveu solicitar que se permita a mobilidade entre as catro provincias

O Goberno vasco, mentres, pediu avanzar á fase 2 e negocia co Executivo central as medidas a aplicar nesa nova etapa. Entre outras cuestións, expón que a hostalería poida abrir o interior dos locais cun aforamento do 50% e que se permita a mobilidade entre territorios históricos, aínda que só por razóns socioeconómicas e non de lecer, deportivas ou culturais.

Á espera de que este venres se coñezan as decisións definitivas, o Goberno da Comunidade de Madrid asegura ver con optimismo a posibilidade de pasar á fase 1 da desescalada o luns 25 de maio tras a reunión deste xoves, na que di que o ministerio recoñeceu as "capacidades" do sistema sanitario madrileño.

O ministro de Sanidade dixo este xoves nunha comparecencia na comisión de Sanidade do Congreso dos Deputados que confía en que "nos próximos días" a maior parte do país estea xa na fase 1 do plan de desescalada.

Comunitat Valencia é a única autonomía que solicitou permanecer nesa fase, mentres que o resto —tanto as que están na 0 como as que xa están na 1— demandan avances totais ou parciais. Son dese último tipo os que defende Castilla-La Mancha (para que entren na etapa 2 (Cuenca e Guadalajara) ou Canarias (para Tenerife, Gran Canaria, La Palma, Lanzarote e Fuerteventura) e Balears (Ibiza, Menorca e Mallorca). 

Mentres piden avanzar por completo á fase 2, ademais de Galicia, País Vasco e Andalucía, Cantabria, Navarra, Asturias, Extremadura, Aragón e Murcia, coa excepción do área de Totana, onde se rexistrou un brote de Covid-19.

Comentarios