O ministro de Sanidade, Salvador Illa, asegurou este venres que todas as comunidades recibiron ben a proposta do Goberno de que, se fixese falta pechar colexios pola Covid, algo non contemplado agora, sería de forma acordada entre o resto de autonomías e Sanidade, e non de xeito unilateral.
Díxoo en rolda de prensa tras participar por videoconferencia na XXII Conferencia de Presidentes Autonómicos, presidida por Pedro Sánchez, e na que se abordou a volta ás aulas no contexto do coronavirus e a situación da pandemia.
"Houbo unha coincidencia en que esas medidas -o peche de colexios-, que afectan a outros territorios, é normal coñecelas polo menos e valoralas conxuntamente, antes de que as tome quen as ten que tomar, que neste caso son as comunidades autónomas", sinalou Illa.
O ministro insistiu en recordar que a competencia sanitaria e educativa téñena as comunidades, pero que nesta Conferencia de Presidentes "houbo un clima moi claro de necesidade de coordinarse, tomando medidas proporcionadas en cada territorio á situación epidemiolóxica".
Na reunión, segundo Illa, púxose "a énfase" na necesidade de abrir a educación presencial
A "última palabra" sobre un posible peche de colexios téñena as comunidades, pero o impacto dunha medida desas "transcende" á que a tome, insistiu.
Na reunión, segundo Illa, púxose "a énfase" na necesidade de abrir a educación presencial, como xa acordaron Sanidade, Educación e as comunidades o pasado 27 de agosto.
Recalcou que existe un protocolo de recomendacións, que pode ir cambiando en función da pandemia, sobre que facer no caso dun contaxio ou un brote nun centro educativo.
Pero este venres considerouse que, se hai que tomar a "decisión drástica de suspensión xeneralizada" nalgunha comunidade -"hoxe non fai falta", "non se contempla hoxe", segundo o ministro-, sería conveniente "falalo entre todos", porque iso ten repercusións noutros territorios, que se valore entre todos, e o Sistema Nacional de Saúde teña coñecemento e faga unha valoración conxunta", continuou Illa.
Ademais, subliñou a "asimetría territorial" en canto á pandemia, xa que non ocorre o mesmo nunha que noutra, incluso dentro dunha mesma.
