martes. 14.07.2020 |
El tiempo
martes. 14.07.2020
El tiempo

O Goberno abre a puerta a permitir cambios de fase na desescalada antes de dúas semanas

Sánchez, acompañado por Darias, Illa e Ribera, na videoconferencia cos presidentes autonómicos. EFE
Sánchez, acompañado por Darias, Illa e Ribera, na videoconferencia cos presidentes autonómicos. EFE
Sánchez di aos presidentes autonómicos que, se nada se torce, moitas comunidades estarán fóra do estado de alarma en breve

O ministro de Sanidade, Salvador Illa, asegurou este domingo que, aínda que o criterio fixado para a desescalada é que un territorio permaneza 14 días nunha fase antes de pasar á seguinte, este prazo pódese acurtar en función de como evolucione a pandemia.

Illa apuntou esa posibilidade nunha rolda de prensa posterior á reunión telemática coas comunidades autónomas desde o Palacio da Moncloa, xunto coa ministra portavoz, María Jesús Montero, ao ser preguntado pola posibilidade de que as provincias poidan superar a fase na que actualmente se atopan antes do previsto inicialmente.

"O que hai vixente é o que se acordou (14 días) e o estado de alarma aplicarase onde sexa necesario e o mínimo tempo necesario. Imos ir tomando as decisións oportunas", dixo, para apuntar que pode haber opcións de "modificar" o prazo.

O ministro reiterou que a desescalada é un proceso "gradual e flexible", para o que se estuda o ritmo epidemiolóxico de cada unidade territorial e deixou claro que a maioría de presidentes autonómicos manifestaron estar a favor de seguir limitando a mobilidade que rexe baixo o estado de alarma.

Con todo, Illa sinalou que, tal e como está exposto, a mobilidade fóra da provincia permitirase na fase 3, unha situación á que toda España pode chegar a finais de xuño ou principios de xullo. 

O Goberno di que aínda non sabe se solicitará unha sexta prórroga, pero que se o fai conta co PNV para que saia adiante 

Tamén avanzou a posibilidade de cambios importantes o presidente do Goberno, Pedro Sánchez, quen comunicou este domingo aos presidentes autonómicos que, se a evolución da pandemia é positiva e nada se torce, moitas comunidades estarán fóra do estado de alarma ao longo dos próximos días. Aínda que non ofreceu máis detalles sobre como se podería implementar esa saída asimétrica por territorios, varios dirixentes autonómicos xa apuntaron que a súa comunidade cumpriría os requisitos para facelo. É o caso de Galicia.

Segundo revelaron fontes autonómicas a Europa Press, Sánchez fixo ese anuncio na súa undécima reunión cos presidentes de comunidades e cidades autónomas desde que foi declarado o estado de alarma, encontro por videoconferencia no que tamén lles dixo que está convencido de que toda España estará fóra do estado de alarma a finais de xuño ou principios de xullo. 

De momento, o Congreso dos Deputados autorizou a quinta prórroga do estado de alarma, que estará en vigor ata o 7 de xuño. O Goberno aínda non decidiu se solicitará unha sexta prórroga, pero a portavoz do Executivo, María Jesús Montero, manifestou que contan co PNV para que saia adiante. Segundo dixo, o Goberno só pediría unha sexta prórroga do estado de alarma se fose "estritamente imprescindible e onde fose estritamente imprescindible". 

En tal caso, apuntou, tratarían de "armar a maioría" suficiente na que asegurou que contan co PNV, despois da polémica desatada a pasada semana cando os partidos que integran o Goberno de coalición, PSOE e Unidas Podemos, asinaron un acordo con EH Bildu para derrogar a reforma laboral. O pacto foi matizado só horas despois.

O Goberno abre a puerta a permitir cambios de fase na desescalada...
Comentarios